Ээлжит бус чуулган зарлан хуралдуулах уу?

УИХ-ын ээлжит бус чуулганыг зарлан хуралдуулах эсэх асуудал өнөөдөр шийдэгдэнэ. Тодруулбал,  УИХ-ын даргын дэргэдэх зөвлөл хуралдаж, ээлжит бус чуулган хуралдуулах эсэхийг хэлэлцэхээр болжээ. Засгийн газар 2026 оны Улсын төсвийн тодотголын төслийг наймдугаар сарын 20-нд УИХ-д өргөн мэдүүлсэн.  Улмаар төсвийн тодотголыг яаралтай хэлэлцэх шаардлагатай гэж үзсэн УИХ дахь АН-ын бүлгээс ээлжит бус чуулганыг нэн даруй зарлан хуралдуулахыг шаардаад байна.  Мөн Засгийн газраас 2027 оны Улсын төсвийн төслийг УИХ-д өргөн мэдүүллээ. Ингэснээр УИХ-ын хэлэлцэх асуудлын дараалалд энэ оны төсвийн тодотгол болон ирэх оны улсын төсөв зэрэгцэн орж ирж байна. УИХ-ын даргын дэргэдэх зөвлөлд УИХ-ын дарга С.Бямбацогт, дэд дарга Ж.Бат-Эрдэнэ, Б.Пүрэвдорж, МАН-ын бүлгийн дарга Ж.Батжаргал, АН-ын бүлгийн дарга О.Цогтгэрэл болон байнгын хороодын дарга нар, УИХ-ын Ерөнхий нарийн бичгийн дарга багтдаг. Тус зөвлөлийн хурлаар ээлжит бус чуулганыг хэзээ эхлүүлэх, ямар асуудлыг хэлэлцэх зэрэг асуудал яригдах боломжтой. УИХ-ын намрын ээлжит чуулганыг есдүгээр сарын 15-нд нээхээр товлоод байна.  Төсвийн тодотголыг ээлжит бус чуулганаар хэлэлцэхээр болсон тохиолдолд парламент есдүгээр сарын 15-аас өмнө хуралдаж, энэ оны төсөвт оруулах өөрчлөлтүүдийг хэлэлцэх юм. Харин ээлжит бус чуулган зарлахгүй бол төсвийн тодотголын хэлэлцүүлэг намрын ээлжит чуулгантай давхцах эсэх, 2027 оны төсвийн хэлэлцүүлэгтэй хэрхэн уялдах нь анхаарал татаж байна.

Т.САЙХАН

Эх сурвалж: “Зууны мэдээ” сонин

2026 ОНЫ ЕСДҮГЭЭР САРЫН 2. ЛХАГВА ГАРАГ. № 164 (7906)