MЭДЭГДЭЛ

  Б.Хурц гэгч Парламент ТВ д өгсөн ярилцлагадаа Д.Цогтбаатар миний үндэс угсааг дур мэдэн тодорхойлж, намайг монгол хүн биш мэтээр гүтгэн доромжилж, улмаар ТЕГ-т яаж орсон нь тодорхойгүй, Сөрөх тагнуулын газрын даргаар ердөө 2 сар ажилласан мэтээр үндэслэлгүй мэдээллийг түгээж миний нэр төр, алдар хүндэд халдсан.

 Энэ хүний худал мэдээлэл тараасан үйлдлүүдийг ЦЕГ-ын харъяа Улсын Мөрдөн байцаах албанд хэрэг бүртгэлтийн 240200417 дугаартай хэрэг нээж шалгаж байгаа бөгөөд өмнө нь намайг Германы иргэний  болон бусад олон хэрэгт холбож удаа дараа гүтгэсэн болохыг шүүхээс тухай бүр эцэслэн шийдвэрлэсэн болно.  

Миний өвөг дээдэс олон үеэрээ Монгол нутагтаа амьдран сууж, улс орныхоо  тусгаар тогтнолын төлөө зүтгэж гавъяа байгуулж ирсэн эгэл жирийн монгол хүмүүс болохыг нотлох баримт холбогдох төрийн байгууллагуудад бий.

Хятадын цэргийн байгууллагад ажилладаг миний хамаатан гэх хүмүүсийнхээ талаарх баримт нотолгоог Б.Хурц хуулийн байгууллагын өмнө гаргаж өгнө биз ээ.

 Миний бие 1998 онд тухайн үеийн Улсын Аюулгүй Байдлыг Хангах Газар (өнөөгийн ТЕГ) -ын Хүний нөөцийн хэлтсээс Тагнуулын байгууллагад ажиллахыг санал болгосны дагуу анх ажилд орсон бөгөөд тус газарт ажилтнаас тасаг, хэлтэс, газрын дарга хүртэл бүхий л шат дамжлагаар мерит зарчмаар тасралтгүй ажиллаж ирсэн.

Намайг сонгон судлаж, Тагнуулын байгууллагад ажиллах санал тавьсан УАБХГ-ын холбогдох хэлтсийн дарга, ажилтнууд одоо ч энх тунх байна.

Би 2007-2009 онуудад болон 2013 онд ТЕГ-ын Сөрөх тагнуулын газрын даргын үүрэгт ажлыг нэр төртэйгээр биелүүлж ирснийг хамт ажиллаж байсан ажилтнууд  гэрчилнэ.   

Тагнуулын байгууллагын нэр төр, дархлаанд ийнхүү балмадаар халдаж өөрийн ядмаг хийгээд өнгөц төсөөллөөр зарчим, үйл ажиллагааг нь гутааж, Монголын төр, түүний аюулгүй байдлыг хангах байгууллагын үйл ажиллагаанд санаатай хохирол учруулж байгаа Б.Хурцын үйлдлийг холбогдох байгууллагууд анхаарна гэдэгт итгэлтэй байна.

.   Б.Хурц гэгч нь олон хүнийг хэлмэгдүүлж, эрүүдэн шүүж, амьдралаар нь хохироож ханахгүй, эдүгээ бусдыг дахин гүтгэн доромжилж,  улс төрийн нам бараадан эрх мэдэлд хүрэхээр санаархаж буйг бид анхааралтай ажиглаж байгаа бөгөөд хуулийн хүрээнд  бүхий л арга хэмжээг авах болно.

Монгол Улсын иргэн                                                                                                             

Баяуд овогт Донровын ЦОГТБААТАР