ЦАХИМ ОРЧИНД ХҮҮХДИЙН ЭРХИЙГ ХАМГААЛАХ, УРЬДЧИЛАН СЭРГИЙЛЭХ ТӨСӨЛ ХЭРЭГЖИНЭ

Өнөөдөр Олон Улсын эрх зүйн хөгжлийн байгууллага (IDLO)-ын төлөөллүүдтэй уулзаж, “Хүүхэд, өсвөр насны хүний эрхийг цахим орчинд хамгаалах, урьдчилан сэргийлэх болон эрх зүйн мэдлэгийг нэмэгдүүлэх нь”, “Монгол Улсад жендерт суурилсан хүчирхийлэлтэй тэмцэх тогтолцоог бэхжүүлэх нь” (II шат) төслүүдийн хэрэгжилт дээр хамтран ажиллахаар боллоо.

2016 онд БСШУСЯ-ны Төрийн нарийн бичгийн даргаар ажиллаж байхдаа цахим орчны соёлтой хэрэглээ, цахим орчин дахь хүүхэд хамгааллын нөлөөллийн ажлыг анх санаачилж, “Цахим гадуурхал цаашаа” үндэсний аяныг зохион байгуулснаар монголын нийгэмд анх удаа цахим орчны хүчирхийлэл, хүүхдийн эрхийн асуудлуудад анхаарах шаардлагатай болсон талаар дуу хоолойгоо хүргэж эхэлсэн.

УИХ-ын гишүүнээр ажиллаж байхдаа Цахим орчинд хүүхдийг хамгаалах тухай хуулийн төсөл боловсруулж, УИХ-д өргөн барьсан боловч батлагдаагүй. Өдийг хүртэл энэ асуудлыг нарийвчлан зохицуулах эрх зүйн орчин маш их дутагдаж байна.

Хууль батлагдахаас гадна, цахим орчин дахь томчуудын үг, үйлдэл, сөрөг үлгэр дуурайлал хэрээс хэтэрч соён гэгээрлийн ажлыг зохион байгуулах хэрэгцээ, шаардлага асар их тулгарч байна. Тиймээс Олон Улсын эрх зүйн байгууллагатай хамтран ажиллах цахим орчинд хүүхдийн эрхийг хамгаалах дээрх төслийн хэрэгжилт, үр дүнд онцгой анхаарч ажиллах болно.