Батлан хамгаалах яам, ШУА хамтран ажиллах шинэ санамж бичигт гарын үсэг зурлаа

Батлан хамгаалах яам болон Шинжлэх ухааны академи хамтран ажиллах шинэчилсэн санамж бичигт гарын үсэг зурах ёслол 2025 оны 4 дүгээр сарын 3-нд боллоо.

Арга хэмжээнд Батлан хамгаалахын сайд С.Бямбацогт, ШУА-ийн ерөнхийлөгч С.Дэмбэрэл, ЗХЖШ-ын дарга хошууч генерал С.Ганбямба болон хоёр талын холбогдох удирдлага, эрдэмтэн, мэргэжилтнүүд оролцсон юм.

Өмнө нь 2022 онд байгуулагдсан уг хамтын ажиллагааг шинэ шатанд гаргах зорилгоор шинэчлэн байгуулж буй уг санамж бичгийн хүрээнд дараах тэргүүлэх чиглэлүүдийг онцлон тусгажээ:

• Цэргийн шинжлэх ухааныг хөгжүүлж, хиймэл оюун ухаан, их өгөгдөл, материал судлал зэрэг шинэ технологийн чиглэлээр судалгааг өргөжүүлэх

• Гарааны технологи, инновацыг дэмжиж, шинжлэх ухаан, технологид суурилсан байгууллага, төв байгуулах

• Доктор болон докторын дараах түвшний судалгааг дэмжиж, залуусын мэдлэг, ур чадварыг дээшлүүлэх

• Судалгаанд шаардлагатай мэдээлэл, дата солилцох нэгдсэн тогтолцоо бүрдүүлэх

• Батлан хамгаалахын шинжлэх ухаан, технологи, инновацын нэгдсэн төвийн судалгааны бааз суурийг бэхжүүлэх

• Хамтын ажиллагааны үр дүнг хэмжих хяналтын механизмыг бий болгож, тогтмол хяналт тавих

Энэхүү шинэ түвшний хамтын ажиллагаа нь батлан хамгаалах салбарын дэвшилтэт хөгжил, шинжлэх ухаанд суурилсан шийдлийг нэвтрүүлэхэд бодитой үр нөлөө үзүүлнэ хэмээн талууд үзэж байна.