Шинжлэх ухаан, технологи, инновац дэмжигч
Шинжлэх ухаан, технологи, инновац дэмжигч
Монголын тулааны шилдэг тамирчдын холбооноосзохион байгуулдаг “MGL-1 Fighting Championship #22”аваргын бүсийн төлөөх тэмцээн “Khangarid Cup” нэрийн дор 6 дугаар сарын 14-ний өдөр Аса Арена-д зохион байгуулагдахаар болжээ.
Тус тэмцээнд монголын шилдэг тулаанчид, мөн Япон, БНСУ, Бразил, Казахстан, Нигери улсын тамирчид оролцох бөгөөд нийт 8 тулаан болох юм. Мөн тус тэмцээний шүүгчдээр Монгол, АНУ, Канад, Сингапурын шүүгчид ажиллана.
Энэхүү тэмцээн нь олон улсын чадварлаг тамирчдыг монголдоо урьж, өрсөлдүүлэн, холимог тулааны ертөнц дэх Монгол Улсын байр суурийг бататгах зорилготой ажээ.
Монголын тулааны шилдэг тамирчдын холбоо нь 2009 онд байгуулагдсан цагаасаа хойш тасралтгүй үйл ажиллагаа явуулж, “MGL-1 Fighting Championship”аваргын бүсийн төлөөх тэмцээнийг 21 удаа, мөн залуу тамирчдын ранк өсгөх “MGL-1 Fight Night” тулааныг 6 удаа тус тус зохион байгуулаад байна.
Дээрх тэмцээнүүдээс төрөн гарсан монголын шилдэг тулаанчдын хувьд дэлхийн холимог тулааны томоохон холбоод болох АНУ-ын UFC, Ази, Номхон далайн орнуудын One Championship, Япон Улсын Deep, Gladiator, БНХАУ-ын JCK зэрэг холбоодод төрийн алтансоёмбот далбаагаа өргөн тулалдаж байна.
Монголын тулааны шилдэг тамирчдын холбооны зүгээс энэ жил олон улсын чанартай 2 тэмцээн зохион байгуулахаар төлөвлөсөн бөгөөд эхнийх нь “Khangarid Cup” бол дараагийн тэмцээн нь 11 дүгээр сард болох товтой байна.
“Khangarid Cup” тэмцээнийг NTV телевиз орон даяар шууд дамжуулна. Тэмцээний тасалбарыг Ticket.mn-ээр борлуулж байгаа аж.
Тасалбар худалдан авах линк: https://ticket.mn/event/2643
