Шинжлэх ухаан, технологи, инновац дэмжигч
Шинжлэх ухаан, технологи, инновац дэмжигч
“Эрдэнэт” үйлдвэрт үйлчлэгчээр ажиллах хүсэлтээ өгсөн боловч Төр засгийн үйлчилгээг эрхлэх газрын сургалтад хамрагдаж үнэмлэх авчрахыг шаардсан. Гэтэл нөгөө газар нь сургалт явуулах зөвшөөрөлгүй юм байна хэмээн нэгэн иргэн манай сайтад хандлаа. Эх сурвалжийн хэлснээр Төр засгийн үйлчилгээг эрхлэх газар үйлчлэгчийн сургалт явуулна хэмээн "Эрдэнэт" үйлдвэртэй гэрээ хийжээ. Гэрээний үнийн дүн ч чамгүй их мөнгө сонсогдов. Хамгийн ноцтой нь тус газар нь сургалт явуулах зөвшөөрөлгүй. Аливаа байгууллага мэргэжлийн болон тусгай, мэргэшлийн сургалтуудыг явуулахдаа Боловсролын яамнаас зөвшөөрөл авах ёстой. Өөрөөр хэлбэл, хуулийн хүрээнд зохих шалгууруудыг хангаж байж зөвшөөрөл авсны үндсэн дээр сургалт явуулна. Гэтэл Төр засгийн үйлчилгээг эрхлэх газрын зөвшөөрлийн хугацаа 2021 онд дуусч, дахин сунгуулаагүй гэнэ. Тэгсэн атлаа “Эрдэнэт” үйлдвэрт үйлчлэгчээр ажиллах хүмүүсийг "сургалтад хамруулсан" нэрээр үнэмлэх тарааж буй нь хэтэрсэн үйлдэл бус уу. Нэг удаад 5-10 хүн бүрдэхээр тус газрын Захиргааны хэлтсийн дарга Д.Уртнасан, чанарын менежмэнтийн ахлах мэргэжилтэн н.Энхтөр нар очиж сургалт явуулдаг гэнэ. Үүнээс гадна хөдөө орон нутгуудад ч сургалт хийдэг, албан томилолт авч явдаг аж. Байгууллага нь сургалт явуулах зөвшөөрөлгүй, томилолтыг ч зориулалт бусаар зарцуулдаг гэсэн үг. Бас нэг ноцтой зүйл нь, сургалтын төлбөрийг хувийн дансаараа авдаг гэх... Иймээс Төр засгийн үйлчилгээ эрхлэх газрын дарга Ж.Тамир, Захиргааны хэлтсийн дарга Д.Уртнасан нарын албан тушаалаа урвуулан ашиглаж, хууль зөрчсөн иймэрхүү үйлдлийг шалган тогтоож, хэрэв буруутай бол хариуцлага хүлээлгэхийг шаардаж байна.
