Х.Булгантуяа: Улс төр, намын зодооноо төрийн ажилруу хутгах нь буруу

Цаг үеийн асуудлаар Улсын Их Хурлын дэд дарга Х.Булгантуяагаас тодрууллаа.

Тэрбээр, улс төр, намын зодооноо төрийн ажилруу хутгах нь буруу гэж бодож байна. Төсөв дээр шүүмжлэлтэй хандаж хэд хэдэн зүйл дээр үг хэлсэн нь хүмүүсийн дургүйг хүргэсэн байж магадгүй. Бид өнөөдөр татвар төлөгчдийн мөнгийг хэрхэн зарцуулахыг шийдэж байгаа учир бие биенийхээ толгойг илээд өнгөрөх биш, ард түмний саналыг сонсох ёстой гэлээ.

-Намын даргын сонгууль 2 өдрийн дараа болох гэж байна. Удирдах зөвлөлөөс их хурлаараа сонгохоор шийдвэрлэсэн гэх мэдээлэл гараад байна. Энэ талаар мэдээлэл өгөөч?

Намын дүрмийн дагуу бага хурлаараа намын даргаа сонгож болдог. Их хурлыг намын бага хурлаар зарладаг. Тэр нь дор хаяж 45 хоногийн дараа хуралдах ёстой. Тэр болтол улс төржилт дэндэхээр байна. Нийгмийг талцуулж хувааж болохгүй. Жирийн намын гишүүдийг ч энэ асуудал дээр хуваагдан талцуулж, бухимдуулаад байж болохгүй.

-Өчигдөр “Лхагвын тойм” нэвтрүүлэг дээр УИХ-ын гишүүн Б.Энхбаяр их хурлын даргатай холбоотой асуудлуудыг ярилаа. Та үүн дээр байр сууриа илэрхийлээч.

Би нэвтрүүлгийг нь үзээгүй. Гэхдээ Б.Энхбаяр гишүүнд баримт байгаа бол шалгуулах бүрэн эрхтэй. Улс төрийн намын даргын сонгуулийг угтаж улс төр хийж болохгүй. Тэр хүнд баримт байсан бол гаргаж ирэх цаг хугацаа зөндөө байсан. АТГ өгөөд шалгуулж болно. Нүүрсний сонсгол хийгээд жил болох гэж байна. Нотлох баримттай, дэлгэнэ шүү л гээд байдаг. Түүнийг дэлгэх зөв цаг гэж байхгүй. Зөв юм хийх гэж л байгаа бол түүнийгээ хийх хэрэгтэй.