НҮБ Энх тайвны хоёр тогтоол баталлаа

НҮБ-ын Ерөнхий Ассамблей Орос-Украины асуудлаар нэг өдөр хоёр өөр тогтоолыг хэлэлцлээ. Украин улс болон Европын холбооноос санаачилсан эхний тогтоолыг батлахад 93 улс дэмжсэн санал өгсөн бол 65 улс түдгэлзэж, АНУ, ОХУ зэрэг 18 улс эсэргүүцсэн санал өгчээ. Харин АНУ-ын ерөнхийлөгч Д.Трампын богино хугацаанд боловсруулан өргөн барьсан хоёр дахь тогтоолыг Ерөнхий Ассамблей эхлээд хүлээн авсангүй. Учир нь уг тогтоолд ОХУ-Украины “мөргөлдөөн” хэмээн нэрлэснээс гадна Оросын цэргүүдийн эзлэн авсан Украины нутаг дэвсгэрийн талаар, ОХУ-ыг олон улсын хууль тогтоомжийг зөрчсөн гэдгийг, мөн Украины нутаг дэвсгэрийн бүрэн бүтэн байдлыг сэргээх шаардлагатай байгааг дурдаагүй байв. Тиймээс Европын орнууд санал гаргаж, нэмэлт өөрчлөлт оруулсан байна. Тогтоолд “Украины нутаг дэвсгэрийн бүрэн бүтэн байдал, “шударга энх тайван”-д хүрэх тухай заалтыг заавал нэмж оруулах шаардлагатай гэсэн байр суурийг илэрхийлснээр нэмэлт өөрчлөлт оруулж тогтоолын төслийг Ерөнхий Ассамблей дахин хэлэлцэж баталжээ. Энэхүү нэмэлт өөрчлөлт оруулсан тогтоолыг 93 улс дэмжиж, АНУ, Израил, Хойд Солонгос тэргүүтэй найман улс татгалзсан бол 73 түдгэлзсэн санал өгснөөр батлагджээ. Хэдийгээр НҮБ-ын Ерөнхий Ассамблейн тогтоол заавал биелүүлэх үүрэг хүлээдэггүй ч дэлхийн улс орнуудын гол үзэл бодлын илэрхийлэл гэж үздэг. Харин Аюулгүйн зөвлөлийн тогтоолыг заавал дагаж мөрдөх ёстой хэмээн үздэг. Даваа гарагт НҮБ-ын Аюулгүйн Зөвлөл АНУ-ын танилцуулсан “Энх тайванд хүрэх зам” гэх нэртэй тогтоолын төслийг хэлэлцэн баталсан. Энэхүү тогтоолыг НҮБ-ын Аюулгүйн зөвлөлийн гишүүн орнуудаас ОХУ, АНУ, БНХАУ зэрэг 10 гишүүн улс дэмжжээ.

АНУ-аас НҮБ-д суугаа төлөөлөгч Дороти Камилл Шеа АНУ-ын тогтоолыг “Энгийн мөртлөө түүхэн мэдэгдэл. Энэ бол зөвхөн урагшаа харсан мэдэгдэл” хэмээн тодорхойлжээ. Гурван жилийн өмнө Орос Украин руу түрэмгийлснээс хойш Аюулгүйн Зөвлөлийн байнгын таван гишүүний нэг болох ОХУ-аас шалтгаалан Аюулгүйн зөвлөл үндсэндээ мухардалд орчихоод байсан гэж хэлж болно. Тийм ч учраас НҮБ-ын Ерөнхий Ассамблей дайны тухай хэлэлцэх гол тавцан болоод байсан. Гэвч Ерөнхий Ассамблейн тогтоолыг гишүүн орнууд заавал биелүүлэх үүрэг хүлээдэггүй.

Б.НЯМСҮРЭН

Эх сурвалж: “Зууны мэдээ” сонин

2025 ОНЫ ХОЁРДУГААР САРЫН 26. ЛХАГВА ГАРАГ. № 39 (7535)