Арай өөрөөр тоглооч улстөрчдөө...

Сонгуулийн “шуурга” хэдийнээ эхэлжээ. Нэр дэвшигчид горилогчдын өрсөлдөөн, хар пиар дунд эмэгтэй улстөрчдийг гүтгэсэн гэхээсээ илүүтэй доромжилсон санаатай үйлдлүүд ихээр харагдах боллоо. Эмэгтэйчүүдийг янаг амрагын асуудал, өмссөн хувцас, идсэн ууснаар нь л унагахаас биш тэдэнд томоохон авлигын асуудал, албан тушаалын гэмт хэргийн түүх бараг л байдаггүй.

Өнөөдрийг хүртэл эрчүүдийн бүтээсэн улс төрийн ертөнцөд эрчүүдийн дүрмээр “тоглох” нь тухгүй бас амаргүй байгаа нь мэдээж. Энэ бүгдийг үүрч, давж чадах нь хэд бол.

Сүүлийн үед эмэгтэйчүүдийн улс төрийг оролцоог нэмэгдүүлэх чиглэлд улсаараа чармайж байхад нөгөө талд хэвлэл мэдээлэл нь олон нийттэй хавсарч эмэгтэйчүүд рүүгээ дайрч, дарах нь их л увайгүй харагдах юм. Угтаа боловсрол, туршлагаар өөрийгөө бүтээсэн эмэгтэйчүүд энэ улс эх орныхоо хөгжлийн төлөө зориглохгүй хөдлөхгүй л бол болохгүй, бүтэхгүй болсныг ухаарсан л хэрэг.

Манай эрчүүд өрсөлдөгч хэдэн эмэгтэйгээ намнах хуучирсан технологио энэ жил дахиад л ашиглаж байх шиг. Эмэгтэйчүүд боловсорч гүйцээд улс төрд оролцъё гэхэд энэ мэт нийгмийн хандлага буюу жендэрийн хэвшмэл ойлголт хамгийн том бэрхшээл болдог. Энэ нийгмийн бугшсан хандлагын эсрэг “Хэвшмэл ойлголтод ЦЭГ ТАВЪЯ” кампанит ажил эхлээд байна.

Боловсрол, туршлага, чадвараараа “ялагдах” нь тодорхой өрсөлдөгчид нь энэ мэт увайгүй аргыг ашигладаг болсныг олон нийт ч хэдийнээ гадарладаг болсон. Арай өөр сонгуулийн өрсөлдөөнийг сонгогчид хүлээгээд удаж байна. Арай өөрөөр тоглооч улстөрчдөө...