Х.Булгантуяа: Таван жил тутамд олгох, төрийн байгууллагад тогтвор суурьшилтай ажилласны нэмэгдлийг энэ жилээс олгоно

 ХНХ-ын сайд Х.Булгантуяа өнөөдөр яамны бүрэлдэхүүний хамт хөдөлмөр, нийгмийн хамгааллын салбарын тайланг сэтгүүлчид, олон нийтэд танилцуулав. Энэ үеэр тэрбээр цалин, тэтгэврийн нэмэгдлийн талаар мэдээллээ.

2023 оны долоодугаарр сарын 1-нээс төрийн албан хаагчдын цалингийн хэмжээг дунджаар 40 хувиар нэмсэн. Одоо энэ оны дөрөвдүгээр сарын 1-нээс 10-20 хувиар нэмэгдүүлж байгаа. Төрийн нийтлэг үйлчилгээний албан хаагчдын хувьд 20 хувиар нэмж байгаа.

Яагаад гэвэл төрийн нийтлэг үйлчилгээнийхний цалингийн түвшин төрийн бусад тусгай болн төрийн захиргааны болон төрийн мэргэжлийн албан хаагчид, багш, эмч нарын цалингаас бага байсан юм. Төрийн бусад албан хаагчдийн үндэсэн цалин 10 хувиар нэмэгдэж, үүн дээр ажилласан жилийн болон үр дүнгийн зэрэг бусад нэмэгдэл 30-40 хувиар орж ирдэг.

Үүнээс гадна аймаг, орон нутагт ажиллаж буй төрийн албан хаагчдийн цалинг төрийн үйлчилгээг  орон нутагт тэгш, хүртээмжтэй, чанартай хүргэхийн тулд аймгийн төвийн суманд ажиллаж буй төрийн албан хаагчдын цалинг 20 хувь, захын болон бусад суманд ажиллаж буй төрийн албан хаагч нарт 40 хувийн нэмэгдэл олгохоор шийдвэрлээд байна гэв.

Мөн 5 жил тутамд олгох, төрийн байгууллагад тогтвор суурьшилтай ажилласны нэмэгдлийг энэ жилээс олгоно. Дээр дурдсан цалингийн нэмэгдлүүдийг 2024 оны дөрөвдүгээр сарын 1-нээс эхлэн олгохоор өчигдрийн Засгийн газрын хуралдаанаар батлаад байна  гэв.

Нийслэлийн алслагдсан 3 дүүрэгт ажиллаж буй төрийн албан хаагч нарын цалинг 20 хувиар нэмж байна. Тэтгэврийн хэмжээг жил бүр инфляцын түвшинтэй уялдуулан 10 хувиар нэмэгдүүлэх шийдвэрийг гаргаад буйг хэллээ.