Улс төрийн намууд улсын хэмжээнд хөгжлийн нэг бодлоготой болох ёстой гэж үзэж байна

Төрийн эрх барих дээд байгууллага УИХ 76 гишүүнээс бүрдэж, 76 гишүүн нь тойргоо тордох нэрээр Соёлын төв засаж, явган гарц, жижиг гүүрэнд зарцуулж, улсын нэгдсэн төсвийг 76 жижиг тойрогт хэрчин хуваадаг байдлаас болж Монгол Улсын хөгжил 32 жил царцлаа.

Энэ нь биднийг гол нэрийн бараа бүтээгдэхүүн болон түүнийг үйлдвэрлэх түүхий эдээ гаднаас импортоор татан авч, эрчим хүчний эх үүсвэрээ мөн л импортлож, дэд бүтэцээ ч хөгжүүлж чадахгүйд хүргэж, эндээс монголчууд нийтээрээ хохирч явна.

Тиймээс Монгол Улс Үндсэн хуульдаа өөрчлөлт оруулж, хөгжлийн нэгдсэн бодлоготой болж, системийн гажигаа засах ёстой гэсэн байр суурийг улс төрийн намууд илэрхийлээд эхэлжээ.

Тодруулбал, АН, ХҮН, ИЗНН, Үнэн ба зөв намын удирдлагууд Монгол Улсын Үндсэн хуульд нэмэлт өөрчлөлт оруулах саналыг гаргаж, Ерөнхийлөгч болон УИХ-д шаардлагаа хүргүүлээд байна.

УИХ-ын 76 жижиг тойрогт санхүүжилт гаргаж, улс орон ч хөгжихгүй, иргэн ч хөгжихгүй бүгд гацаанд орж байхаар Үндсэн хуульд нэмэлт өөрчлөлт оруулж, парламентын гишүүдийн тоог нэмэгдүүлж, улсын хэмжээнд бүтэн нэг тойрог болгон, УИХ-ын гишүүд хөгжлийн бодлого, шийдвэрээ Монгол Улсын 3.4 сая иргэний төлөө, улс орныхоо төлөө гаргаж, санхүүжилтээ шийддэг болж байж бид эдийн засгаа тэлнэ гэж улс төрийн намын төлөөллүүд үзэж байгаа аж.

Энэ байр суурин дээр улс төрийн намууд бүгд бараг анх удаа санал нэгдэж байна гэж УИХ-ын гишүүн Т.Доржханд өнгөрсөн долоо хоногт мэдэгдэв.