Мэргэжлийн сүмогийн Ошима дэвжээ дахин нээгдсэн талаар бид мэдээлсэн. Энэ дэвжээнд анхны монгол сүмочид болох Д.Батбаяр Кёкүшюүзан, Н.Цэвэгням Кёкүтэнхо, М.Энхбат Кёкүтэнзан тэргүүтэй зургаан элсэн барилдаж эхэлснээр монголчуудын сүмод хүч сорих замнал эхэлсэн түүхтэй.
2012 оны дөрөвдүгээр сард Ошима багш тэтгэвэрт гарч, дэвжээгээ залгамжлах эрхийг Н.Цэвэгням Кёкүтэнход уламжлуулсан ба тэр үед ид барилдаж байсан Н.Цэвэгням нэг галын Томоцүна дэвжээнд шилжин барилдсанаар Ошима дэвжээ одоогоос 10 жилийн өмнө хаагдсан юм.
Н.Цэвэгням Кёкүтэнхо 2015 оны долоодугаар сарын Нагоя башёд зодог тайлж, Томоцүна дэвжээнд Ошима багшийн нэрээр багшлах байсан ч Томоцүна багш дэвжээ тэргүүлэн багшлах насны хязгаар дүүрч, туслах багшийн ангилалд шилжихдээ тэргүүн багшийн эрхээ Н.Цэвэгням Ошима багшид шилжүүлж, багшлах эрх ба нэрээ солилцон Н.Цэвэгням Томоцүна дэвжээг тэргүүлэх болсон билээ.
Өмнөх үеийн Томоцүна багш болох Ошима багш 2022 оны хоёрдугаар сард тэтгэвэрт гарсан учир Н.Цэвэгнямд Томоцүна дэвжээг үргэлжлүүлэн тэргүүлэх эсвэл өөрийн унаган дэвжээ болох Ошима дэвжээгээ дахин нээх гэсэн сонголт тулгарчээ.
Тэрээр өөрийг нь анх сүмод хөтлөн оруулж, аж амьдралын гараагаа эхэлсэн Ошима дэвжээгээ сэргээн нээхээр шийдэж, Ошима багшийн нэрээ сонгосон байна.
Өнөөдөр Ошима дэвжээнд Томоцүна дэвжээнд харьяалагдаж байсан бие бүрэлдэхүүн бүгдээрээ шилжин, шинээр баригдах дэвжээгээ ашиглалтад орох хүртэл хугацаанд одоогийн дүүрэг байрандаа үйл ажиллагаа үргэлжлүүлэхээр тогтсон байна.
Ошима дэвжээ:Ояката Кёкүтэнхо
Туслах багш: Тамагаги ояката, Кирияма ояката
Макүүчи зиндааны Кайсэй тэргүүтэй 8 сүмоч
Дэвжээн дэхь 3 шүүгч ба гёожи засуул, ёбидаши 2, үсчин нэг гэсэн бүрэлдэхүүнтэй гараагаа эхлүүлж байна.
