САЙД Ц.САНДАГ-ОЧИР ШУУРХАЙ ХУРАЛДААН ЗАРЛАЖ, ХОЛБОГДОХ АСУУДЛААР ҮҮРЭГ ЧИГЛЭЛ ӨГЛӨӨ

БОУАӨ-ийн сайдын ээлжит шуурхай хуралдаан өнөөдөр боллоо.

Туc хуралдаанаар салбар яамны газар, хэлтсийн удирдлагууд болон харьяа байгууллагуудын мэдээллийг сонсож, цаг үеийн нөхцөл байдал, болзошгүй эрсдэл болон авч хэрэгжүүлж буй арга хэмжээний талаар хэлэлцлээ.

Мөн Цаг уур, орчны шинжилгээний газраас ойрын өдрүүдийн цаг агаарын төлөв, хур тунадасны хэмжээг урьдчилсан байдлаар танилцуулав.

Сайд Ц.Сандаг-Очир уур амьсгалын өөрчлөлтөөс үүдэн агаарын нөхцөл байдал богино хугацаанд эрчимтэй өөрчлөгдөж байгаа энэ үед урьдчилан сэргийлэх арга хэмжээг шуурхай авч хэрэгжүүлэх, мэдээллийг иргэд, олон нийтэд цаг алдалгүй, ойлгомжтой хэлбэрээр хүргэх, салбарын байгууллагуудын уялдаа холбоог хангаж ажиллахыг үүрэг болголоо.

Тодруулбал, холбогдох байгууллагуудад:

- Цаг агаарын аюултай болон гамшигт үзэгдлийн урьдчилсан мэдээ, сэрэмжлүүлгийг шуурхай хүргэх;

- Гол, мөрөн, нуурын усны түвшин болон үерийн эрсдэлтэй бүсүүдэд хяналт, ажиглалтыг эрчимжүүлэх;

- Үер, усны эрсдэл өндөртэй бүс нутгийн мэдээллийг орон нутгийн холбогдох байгууллагуудад тухай бүр хүргэж, мэргэжил арга зүйн дэмжлэг үзүүлэх;

- Тусгай хамгаалалттай газар нутаг, аялал жуулчлалын бүсэд зорчиж буй иргэдэд сэрэмжлүүлэг, мэдээллийг тогтмол хүргэх;

- Байгаль орчинд учирч болзошгүй эрсдэл, бохирдлын нөхцөл байдалд хяналт тавьж, шаардлагатай тохиолдолд шуурхай арга хэмжээ авах;

- Салбарын хэмжээнд хариуцлагатай жижүүр ажиллуулж, нөхцөл байдлын мэдээллийг тогтмол нэгтгэн танилцуулж байх чиглэл өглөө.

БОУАӨ-ийн сайд Ц.Сандаг-Очир “Цаг агаарын аюултай үзэгдлийн үед мэдээллийн хурд, байгууллагуудын уялдаа холбоо хамгийн чухал. Эрсдэл бий болсны дараа арга хэмжээ авахаас илүүтэй эрсдэлийг урьдчилан тооцоолж, иргэдэд мэдээллийг цаг алдалгүй хүргэж ажиллах шаардлагатай.

Салбарын байгууллагууд бэлэн байдлаа хангаж, нөхцөл байдлыг бодитоор үнэлэн, шуурхай ажиллах ёстой” гэдгийг онцоллоо.

Мөн үер, усны эрсдэлтэй бүс нутгийн нөхцөл байдлыг тогтмол хянаж, шаардлагатай мэдээллийг Онцгой байдлын байгууллага болон аймаг, нийслэл, сум, дүүргийн холбогдох байгууллагуудтай шуурхай солилцож ажиллахыг чиглэл болголоо.