Аргентин ДЭМБ-аас албан ёсоор гарав

Аргентин улс Дэлхийн эрүүл мэндийн байгууллага (ДЭМБ)-аас гарах шийдвэр гаргасан нь албан ёсоор хэрэгжиж эхэлжээ. Мягмар гарагт тус улсын Гадаад хэргийн сайд Пабло Кирно энэ талаар мэдэгдэж баталгаажуулсан байна. ДЭМБ нь дэлхийн эрүүл мэндийн чиг хандлагыг хянах, халдварт өвчнийг тандалт хийх, эрүүл мэндийн үйлчилгээний хүртээмжийг дэмжих, эмнэлгийн ажилтнуудыг сургах зэрэг үүрэгтэй байгууллага юм. Уг шийдвэрийг анх өнгөрсөн оны хоёрдугаар сард зарласан бөгөөд нэг сарын дараа Ерөнхийлөгч Хавьер Милейгийн засгийн газар ДЭМБ-д албан ёсны мэдэгдэл хүргүүлснийг Кирно тайлбарлажээ.

Милей Аргентиныг ДЭМБ-аас гаргах болсон нь түүний улс төрийн холбоотон АНУ-ын Ерөнхийлөгч Дональд Трампын шийдвэртэй шууд холбоотой. АНУ-ын ерөнхийлөгч Трамп хэдхэн сарын өмнө ДЭМБ-аас гарна гэдгээ зарлаж үүнийгээ баталгаажуулснаас нэг сарын дараа Милей дээрх үйлдлийг хийжээ.

Хоёр удирдагч хоёулаа эрүүл мэнд, анагаах ухааны салбарт “прогрессив бодлого” хэрэгжүүлж байна хэмээн буруутган, олон улсын байгууллагуудыг шүүмжилсээр ирсэн юм.

Либертари үзэл баримтлалтай Ерөнхийлөгч Милей COVID-19 цар тахлын үеийн зөвлөмжүүдийг шүүмжилж, амны хаалт зүүх, зай барих, вакцинжуулалт зэрэг халдварын тархалтыг бууруулах арга хэмжээнүүдийг эсэргүүцэж байв.

“Өнөөдөр Аргентины Дэлхийн эрүүл мэндийн байгууллагаас гарах шийдвэр хэрэгжиж эхэлж байна. Энэ нь манай улс албан ёсны мэдэгдэл хүргүүлснээс хойш нэг жил өнгөрснийг тэмдэглэж байна” хэмээн Кирно мягмар гарагт олон нийтийн сүлжээнд бичжээ.

“Аргентин улс цаашид эрүүл мэндийн салбар дахь олон улсын хамтын ажиллагааг хоёр талын хэлэлцээр болон бүс нутгийн түвшинд үргэлжлүүлэн дэмжихийн зэрэгцээ, өөрийн ард иргэдийн эрүүл мэндийн асуудлыг бие даан хариуцах болно” гэж онцолсон байна.

Мөн Ерөнхийлөгч Милей олон нийтийн сүлжээнд нийтэлсэн мэдэгдэлдээ ДЭМБ-ыг “хортой байгууллага” хэмээн тодорхойлж, COVID-19-ийн үеийн арга хэмжээнүүдийг “түүхэн дэх хамгийн том нийгмийн хяналтын туршилт” байсан гэж шүүмжилжээ.

АНУ-ыг ДЭМБ-аас гарах шийдвэрээ албан ёсоор хэрэгжүүлэхэд ДЭМБ-ын тэргүүн Тедрос Адханом Гебрейесус харамсч байгаагаа илэрхийлж энэхүү шийдвэр нь АНУ төдийгүй дэлхий дахины аюулгүй байдлыг сулруулж байна” гэж онцолж байв.

Б.НЯМСҮРЭН

Эх сурвалж: “Зууны мэдээ” сонин

2026 ОНЫ ГУРАВДУГААР САРЫН 19. ПҮРЭВ ГАРАГ. № 52 (7794)