Шинжлэх ухаан, технологи, инновац дэмжигч
Шинжлэх ухаан, технологи, инновац дэмжигч
УИХ-ын чуулганы өнөөдрийн нэгдсэн хуралдаанаар Засгийн газраас өргөн мэдүүлсэн Гашуунсухайт-Ганцмод боомтын хил дамнасан төмөр зам, нүүрсний худалдаа, Тавантолгойн нүүрсний уурхайн хүчин чадлыг нэмэгдүүлэх хамтын ажиллагааны тухай Монгол Улсын Засгийн газар болон БНХАУ-ын Засгийн газар хоорондын хэлэлцээрийг соёрхон батлах тухай хуулийн төслийг хэлэлцлээ. Чуулганы нэгдсэн хуралдаанд 110 гишүүн оролцсоноос 98 нь хэлэлцээрийг соёрхон батлахыг дэмжжээ.
Ингэснээр 2004 оноос эхлэн яригдаж, 2008 оноос хойш 17 жилийн хугацаанд нийт 60 гаруй удаагийн яриа хэлэлцээ хийгдэж, Үндэсний аюулгүй байдлын зөвлөлийн 3 зөвлөмж, Улсын Их Хурлын 6 тогтоол, Засгийн газрын 45 тогтоол гарсан хил дамнасан төмөр замын бүтээн байгуулалтын асуудал төрийн талаасаа эцэслэгдлээ. Хэлэлцээрийг соёрхон баталсан тул одоо бүтээн байгуулалтад оролцох аж ахуйн нэгжийг сонгон шалгаруулж, компани хоорондын гэрээнүүд хийгдэж, ажлыг энэ хавартаа багтаан эхлүүлж, 2027 онд дуусгах боломж бүрдэж байна.
Монгол Улсын нийгэм, эдийн засагт шууд болон шууд бус олон нөлөөлөл үзүүлэх энэхүү Гашуунсухайт-Ганцмод хил дамнасан төмөр зам бол Монгол Улс, БНХАУ-ын хооронд 1955 оны хэлэлцээрээр байгуулсан Замын-Үүд, Эрээн төмөр замаас хойш 70 жилийн дараа хийгдэж буй 2 дахь хил холболтын төсөл юм. Цаашлаад өмнөд хөрштэйгээ гурав, дөрөв, тав дахь буюу Шивээхүрэн-Сэхээ, Бичигт-Зүүнхатавч, Ханги-Мандалын боомтууд гэж төмөр замаар үе шаттай холбогдох, баруун, зүүн тэнхлэгийн төмөр замын төсөл хэрэгжих нөхцөл бүрдэж байна. Бүтээн байгуулалтыг 1.9 жилийн хугацаанд гүйцэтгэж, 2027 оноос төмөр зам холбогдон, ашиглалтад орно.
