Чоно Үүр Шөнөөр Ирдэг кино Univision, DDish ВИДЕО САНД орлоо

Ийнхүү 2026 оны Оскарын шилдэг олон улсын кино төрөлд Австрали улсаас албан ёсоор нэр дэвшсэн, Австрали, Монгол ба Герман улсын хамтын бүтээл, найруулагч Габриел Брадигийн бүтээл анх удаа Монгол үзэгчдийн хүртээл болов.

Байгаль цаг уурын өөрчлөлтийн “хуй салхинд” өртөж, УБ рүү нүүх болсон Баянхонгор аймгийн Бууцагаан сумын харьяат Давгасүрэнгийн Даваасүрэн болон түүний гэргий Дашзэвэгийн Отгонзаяа нарын их НҮҮДЭЛ, түүнийг даган өрнөх ОЛСОН бас ГЭЭСЭН үнэт зүйлсийн тухай бодит түүх юм.

Дэлхийн дулаарал болон цаг уурын өөрчлөлтөд нүүдлийн мал аж ахуй дагасан амьдрал бараг ямар ч нөлөөгүй "ногоон" амьдралын хэв маяг боловч түүний үр дагаварыг хамгийн их хүртэж байгаа хүмүүс бол Монгол соёлын цөмийг тээж яваа малчид билээ.

Бид ган зуд, байгалийн гамшгийн талаар ярихдаа үргэлж ингэж шуурч, тэгж хүйтэрч, тэдэн толгой мал хорогдсон гэх статистик тоо ярихаас биш түүний цаань байгаа малчин хүний сэтгэл зүрхэнд ямар "шуурга" болж байгааг тэр болгон ярьдаггүй, мэддэггүй.

Харин энэ талаар Даваа Заяа хоёрын түүх Таньд нэгийг бодуулах нь дамжиггүй. Учир нь тэдний түүх ҮНЭН, ҮНЭТ ЗҮЙЛТЭЙ, ЯРУУ бас ХАЛУУН ДУЛААН билээ.