ЗА ТЭГВЭЛ ЦУСАА БЭЛЭГЛЭЕ...

"Нэг удаа бэлэглэсэн цус гурван хүний амь насыг авардаг гэж сонсоод "За тэгвэл өгье" гэж шуудхан шийдсэн" гэж ярих үе тэнгийн гурван залуутай ЦССҮТ-ийн Баянзүрх цус цуглуулах төв дээр танилцлаа.

О.Ууганбаяр, С.Балжинням, Ц.Жамьяншарав хэмээн өөрсдийгаа танилцуулсан даруухан залуус маань ХААИС-ийн барилгын инженерийн ангийг хоёр жилийн өмнө төгссөн нэг ангийнхан аж. Сургуулиа дүүргээд өөр өөрсдийн амьдралаа хөөн одсон ч үргэлж холбоотой байж хүний амийг авардаг хамгийн буянтай үйлс болох цусны донорын эгнээнд хамтдаа нэгджээ.

"Бид гурав мэргэжлийнхээ дагуу барилгын салбарт ажиллаж байгаа. Цаг зав гарсан үедээ нийлж ирээд цусаа өгдөг" гэж байна. Чөлөөт цагаа хүмүүнлэгийн үйлсэд зориулдаг  зөв сэтгэлтэй залуустаа олширч байгаа нь бахархалтай.

Д.Дорж