“Чоно үүр шөнөөр ирдэг” киноны гол дүрүүдэд Канадын Засгийн газар виз олгохоос татгалзжээ

Торонтогийн олон улсын кино наадам эхлээд байна. Дэлхийн томоохон 5 фестивалийн нэг энэхүү  наадамд  цаг уурын өөрчлөлтийн улмаас малгүй болж хот бараадсан монгол айлын түүхийг өгүүлэх “Чоно үүр шөнөөр ирдэг” (The Wolves Always Come at Night) баримтат кино сонгогдон шалгарч 2024 оны 9-р сарын 9-ны өдөр нээлтээ хийхээр болсон билээ.

  Монгол, Австрали, Германы уран бүтээлчдийн хамтран бүтээсэн энэ кино 96 минут үргэлжлэх бөгөөд зудад малаа алдсан Д.Даваасүрэн, Д.Отгонзаяа нар зохиолч, найруулагч Габриэллэ Брэдитэй хамтран амьдралын түүхээ кино зохиол болгон бичиж, гол дүрд өөрсдөө тогложээ.

 Баянхонгор аймгаас Улаанбаатарт шилжин суурьшсан, дөрвөн хүүхэдтэй, Д.Даваасүрэнгийнх хэмээх айлын амьдралыг өгүүлэх энэ кинонд Монголоос “Guru Media” компани хамтран ажиллажээ. Киноны эрхийг баримтат кино борлуулалтын “Cinephil” компани худалдан аваад байгаа аж. Кино ирэх сарын 9, 10, 12, 14-нд дэлгэцнээ гарна. Мөн  Монгол Улсад энэхүү баримтат киноны нээлтийг хийж, үзэгчдийн хүртээл болгох юм байна.

 Энэхүү баримтат киноны   гол дүр болох залуу хос Д.Даваасүрэн, Д.Отгонзаяа нарт Канадын Засгийн газар   виз олгохоос  татгалзсан учир Торонтогийн олон улсын кино наадамд оролцож киногоо нээх  боломжгүй болжээ.

“Виз олгох үйл явц үнэхээр шударга бус байна. Хоёр сар гаруй хугацаа зарцуулсан ч зөвшөөрөөгүй хэвээр байна” гэж баримтат киноны продюсер Рита Уолш өнгөрсөн лхагва гарагт хийсэн мэдэгдэлдээ дурджээ.

Х.Тамир