Германы аж үйлдвэрлэл нарны эрчим хүчийг ашиглана

Томоохон бүтээн байгуулалтуудын амин сүнс бол эрчим хүч. Үйлдвэр, технологийн ажиллагааг цахилгаанаар шийдэж өгсөн нь өнгөрсөн зууны хамгийн том ололт. Гэвч эрчим хүч үйлдвэрлэлийн салбар өнөө үед хэд хэдэн чухал сорилтуудтай нүүр тулж байна. Тодруулбал, нүүрсний шаталтаас эрчим хүч гаргах нь уур амьсгалын өөрчлөлтийн суурь шалтгааны нэгд тооцогдож байна. Мөн атомын цахилгаан станц нь аюулгүй байдлын хувьд эргэлзээ, айдсыг дагуулсаар  байгаа билээ. Дэлхийн улс орнууд байгаль экологи, тогтвортой хөгжлийн зорилтуудтай уялдуулан хэд хэдэн гэрийн даалгавруудыг биелүүлэх шаардлагатай. Тиймээс зарим орны засгийн газрууд эрчим хүчний үнийг нэмэгдүүлэх сонголтыг хийх болсон. Үүний нэг жишээ бол Герман улс юм. Автомашин, хүнд үйлдвэрлэлийн салбарт тэргүүлэх тус орны эрчим хүчний зардал бүс нутагтаа өндөрт тооцогддог. Тиймээс үйлдвэрлэгчид эрчим хүчний зардлаа хянаж, багасгахын тулд нарны эрчим хүч буюу сэргээгдэх эрчим хүчний салбар руу ихээхэн анхаарч байна.

Германы аж үйлдвэрлэгчдийн нэг төлөөлөл болох Филипп Маттиас нарны зай хураагуурт нийт 2.3 сая еврогийн хөрөнгө оруулалтыг хийжээ. Тэрээр энэ талаар “Мэдээж ийм хэмжээний хөрөнгө оруулалтыг хийхэд эхэндээ эргэлзээ төрсөн. Гэвч сэргээгдэх эрчим хүч рүү оруулж бй хөрөнгө оруулалт бол сайн хөрөнгө оруулалт. Тухайлбал, нарны зайн хураагуурын үйлдвэрлэгчид бидэнд 20 жилийн баталгаа өгч байна” гэсэн юм. Европын ихэнх орнууд ОХУ-ын газрын хийн түлшийг өргөн хэрэглэдэг. Харин гурван жилийн өмнө эхэлсэн Укриан дахь тусгай цэргийн ажиллагаанаас үүдэн түлшний нийлүүлэлт эрс буурсан. Тиймээс Германы эрх баригчид нарны эрчим хүчийг өргөтгөх, нийтийн хэрэглээнд нэвтрүүлэхэд чиглэсэн хууль тогтоомжуудыг баталсан. Үүнд сэргээгдэх эрчим хүч үйлдвэрлэгчдэд татварын хөнгөлөлт үзүүлж, үйлдвэрлэлийн зардлыг бууруулахад чиглэсэн хууль, тогтоомж багтаж буй. Эрх баригчид ийнхүү 2030 он гэхэд нийт эрчим хүчний 80 хувийг сэргээгдэх эрчим хүчээр хангахаар төлөвлөөд байгаа юм.

Герман нарны болон салхины эрчим хүч үйлдвэрлэлээрээ европын бүс нутагт тэргүүлэгч улс хэдий ч жижиг, дунд компаниуд зардал өсөж байгаа шалтгаанаар ашиглах боломжгүй байсан юм. Тиймээс компаниудын дээвэр дээрх нарны зайн хураагуурын нийт хүчин чадал өнгөрсөн онтой харьцуулахад 82 хувиар өсжээ. Мөн орон сууцны салбарт байршуулсан нийт зай хураагуур нэг хувийн өсөлттэй байгаа нь судалгаагаар тогтоогджээ. Мөн “YouGov” судалгааны хүрээлэнгийн тавдугаар сард хийсэн санал асуулгаар Германы компаниудын талаас илүү хувь нь ойрын гурван жилд нарны эрчим хүчний систем суурилуулахаар төлөвлөж байгаа гэжээ.

Н.ЖАРГАЛМАА

Эх сурвалж: “Зууны мэдээ” сонин

2024 ОНЫ ДОЛООДУГААР САРЫН 3. ЛХАГВА ГАРАГ. № 130 (7374)