156 хүн амь үрэгдсэн Итэвон

2022 оны 10 дугаар сарын 29-ний орой шөнийн амьдралаараа алдартай Итэвонд олон арван мянган хүн Сүнсний баяр тэмдэглэхээр цуглахдаа бага орон зайд шахалдсаны улмаас 156 хүн бусдад гишгэгдэж, амьсгаа боогдож нас барсан эмгэнэлт үйл явдал болсон билээ. Энэ өдөр Сөүлийн оршин суугчид гурван жилийн дараа анх удаа цар тахлын хорио цээрийн дэглэмгүй баярлахаар цугларсан юм.

Итэвоны залуус, жуулчид ихээр цугладаг гудамж нь нарийхан, 2-3 богино гудамж дамнан оршино. Гудамжинд үймээн самуун, түгжрэл болоход хаашаа ч хөдлөх аргагүй. Хоёр талаараа зугаа цэнгээ, хоолны газруудаар хашигдсан.

Дээрх эмгэнэлт явдлаас хойш цагдаагийн байнгын эргүүл гарчээ. Мөн эмгэнэлт явдлаар нас арсан хүмүүсийн гэгээн дурсалд зориулан самбар байрлуулсан байна. Хэдийгээр эмгэнэлт явдал болж амь үрэгдэгсдийн ар гэрийнхэн уй гашуунаасаа салаагүй байгаа ч энд шөнийн нөгөө л амьдрал, залуусын зугаа цэнгээ үргэлжилсээр.

Итэвоны ослын үеэр 156 хүн амь үрэгдэж, 187 хүн бэртсэн юм. Амиа алдагсдын 26 нь дэлхийн 14 улсын харьяат, гадаадын иргэд байжээ.