Шинжлэх ухаан, технологи, инновац дэмжигч
Шинжлэх ухаан, технологи, инновац дэмжигч
Зэвсэгт хүчний 339 дүгээр ангид 2023 оны хоёрдугаар ээлжинд хугацаат цэргийн албанд татагдан ирсэн мотобуудлагын ротын 1 дүгээр салааны байлдагч М.Эрдэнэбаатар элсэлтийн ерөнхий шалгалтад монгол хэл, англи хэл, математик, нийгмийн ухааны хичээлээр хамрагдаж, үүнээс математик, нийгмийн ухааны хичээлд өндөр оноо авсан юм. Энэхүү баярт мөчид байлдагч М.Эрдэнэбаатарын сэтгэгдлээс хуваалцъя.
Юуны өмнө манай уншигчдад өөрийгөө танилцуулаач?
- Намайг Мөнхбаярын Эрдэнэбаатар гэдэг. Баянхонгор суманд төрсөн, 18 настай. 2023 оны хоёрдугаар ээлжийн цэрэг татлагаар Зэвсэгт хүчний 339 дүгээр ангид хуваарилагдаж, хугацаат албаа нэр төртэйгөөр хааж байна.
Та өмнө нь цэргийн алба хаахыг хүсдэг байсан уу? Эсвэл цэргийн зарлан хуудас аваад гэнэт шийдэв үү?
- Би өмнө нь Дотоод хэргийн их сургуульд суралцана гэсэн бодолтой байсан. Харамсалтай нь, элсэлтийн ерөнхий шалгалтад тааруу оноо авсны улмаас өөрийнхөө хүссэн сургуульд орж чадалгүй өнгөрсөн. Тэгээд би цэргийн алба хаах хүсэл төрөөд ирсэн.
Цэргийн албаны хамгийн бахархалт зүйл нь юу вэ?
- Өмнө нь цэргийн амьдралыг их чанга гэж боддог байсан. Өөрийн биеэр алба хаах хугацаанд бодож байсан бүх зүйл өөр юм билээ. Олон аавын хөвгүүдтэй мөр зэрэгцэн алба хааж тэсвэр хатуужил сууж, бусдыгаа гэсэн амь нэгтэй болж байна. Энэхүү богино хугацаанд, олон сайхан анд найзуудтай нөхөрлөж явна. (инээв) Миний хувьд бидний нэгнээ гэсэн сэтгэл үнэхээр бахадмаар шүү. Мөн цэргийн албанд татагдаж ирээд бие бялдрын хөгжлөөс гадна сэтгэлийн их хат суудаг юм шиг санагдсан.
Ирээдүйн зорилгоо тодорхойлбол?
- Цэргийн албанд ирэхээс өмнө цагдаа болох хүсэлтэй байсан. Харин өдгөө энэ бодол маань өөрчлөгдсөн. Би энэ ангидаа барилгын өргөн мэргэжил эзэмшээд Ахлагчийн албанд шилжих, цаашлаад Үндэсний батлан хамгаалахын их сургуульд суралцаж офицер болох зорилготой болсон доо.
Элсэлтийн ерөнхий шалгалтад хэрхэн бэлтгэж орсон бэ? Цэргийн алба хаах хугацаанд бэлтгэх цаг зав байсан уу?
- Цэргийн алба хааж байх хугацаанд элсэлтийн ерөнхий шалгалтыг бэлтгэх хугацаа хангалтай байсан. Ротын захирагч болон мөр зэрэгцэн алба хааж байгаа найз нөхөд, мөн ангийн удирдлагын зүгээс ч элсэлтийн ерөнхий шалгалтад бэлтгэх бололцоогоор бүрэн хангасан. Тиймээс миний хувьд элсэлтийн ерөнхий шалгалтаа амжилттай өгч, өмнөх шалгалтаар авсан оноогоо илт дээшлүүлсэн. Энэ завшааныг ашиглан бүхий л нөхцөл, боломжоор хангаж, дэмжсэн тус ангийн удирдлага болон ротын захирагчдаа талархсанаа илэрхийлье. Мөн гэр бүлийнхэндээ хайртай шүү гэж хэлмээр байна.
Дэслэгч Б.ПАГАМСҮРЭН
