Монгол Улсын сайд, Боомтын сэргэлтийн Үндэсний хорооны дарга Б.Тулга, ажлын албаны дарга Т.Төрболд болон Хилийн боомтын захиргааны дарга Б.Батхишиг тэргүүтэй холбогдох албаныхан өнөөдөр /2023.05.11/ БНХАУ-аас Монгол Улсад суугаа Онц бөгөөд Бүрэн эрхт Элчин сайд Цай Вэньруйг хүлээн авч уулзлаа.
Уулзалтаар Монгол Улсын сайд, Боомтын сэргэлтийн Үндэсний хорооны дарга Б.Тулга хоёр орны гадаад худалдааны эргэлтийг богино хугацаанд 20 тэрбум ам.долларт хүргэх зорилтын хүрээнд боомтуудын дэд бүтцийг сайжруулах, хүчин чадлыг нэмэгдүүлэх, ажиллах цагийн хуваарьт өөрчлөлт оруулах, төмөр замын холболтын ажлыг түргэсгэхэд анхаарах шаардлагатайг онцоллоо.
БНХАУ-аас Монгол Улсад суугаа Элчин сайд Цай Вэньруй Монгол Улсын сайд, Боомтын сэргэлтийн Үндэсний хорооны даргаар томилогдсонд баяр хүргээд, хөрш орны харилцаанд боомтын асуудал хамгийн чухал гэдгийг цохон тэмдэглэж, ойр дотно хамтран ажиллахаа илэрхийлэв.
