Volkswagen микро автобусныхаа бүрэн цахилгаан загварыг танилцууллаа

Германы автомашин үйлдвэрлэгч Volkswagen домогт микро автобусныхаа залгамжлагч болох бүрэн цахилгаан ID.Buzz загварыг танилцуулжээ. ID.Buzz энэ оны сүүлээр Европын зах зээлд нэвтрэх бол АНУ-ын зах зээлд 2024 оноос худалдаалагдаж эхлэх гэнэ.Шинэ бүтээгдэхүүн нь зорчигч тээврийн болон ачаа тээврийн гэсэн хоёр хувилбартай, бас урт болон богино эх биеийн сонголттой үйлдвэрлэгдэх юм байна. Суудлын тоо нь бас тав, зургаа, долоо гэсэн сонголтуудтай байх гэнэ. Зохион бүтээгчид нь ID.Buzz-ийг сүүлийн жилүүдэд хүмүүсийн дунд өсөн нэмэгдсэн зайнаас ажиллах, аялж зугаалах эрэлт хэрэгцээнд нийцүүлэхийг зорьжээ.Гадна талаасаа хуучны микро автобустай төстэй харагдах ч дотор талд нь технологийн дэвшлийг бүрэн шингээсэн байна. 201 морины хүчин чадалтай бүрэн цахилгаан хөдөлгүүр нь арын хоёр дугуйг хөтөлдөг байх гэнэ.Эх биеийн доод хэсэгт байрлуулсан 82kWh батарей нь 170 киловаттын цэнэглэгчээр 30 минутын дотор 5 хувиас 80 хувь хүртлээ цэнэглэгдэж чадах юм байна. ID.Buzz загварын үнэ, техникийн илүү дэлгэрэнгүй мэдээлэл зах зээлд нийлүүлэгдэх үед ил болох гэнэ.