Нэрт архитектор Дэвид Сим хот төлөвлөлтийн мастер лекц уншина

“20 минутын хот” Үндэсний хороо, Хот төлөвлөлт, барилга орон сууцжуулалтын яам, “Мэгүүн” медиатай хамтран зохион байгуулж буй  “Зөөлөн хот” фестивальд оролцохоор “Зөөлөн хот” номын зохиогч, Дани улсын архитектор Дэвид Сим Улаанбаатар хотноо ирээд байна. Тэрбээр дөрөвдүгээр сарын 17-ны өдөр “20 минутын хот” Үндэсний хороонд зочилж, Ажлын албаны дарга Ц.Оюундарь, Монгол Улсын сайд, “20 минутын хот” Үндэсний хорооны даргын зөвлөх Б.Батболд тэргүүтэй ажлын албаны алба хаагчид болон “20 минутын хот” хөгжлийн төвийн хамт олонтой уулзалт хийлээ. Уулзалтын үеэр Үндэсний хороо болон хөгжлийн төвийн алба хаагчид хот төлөвлөлтийг хүнд ээлтэй, илүү зөөлөн хот болгон төлөвлөх талаар өөрсдийн санал бодлыг солилцож, Улаанбаатар хотод хэрэгжүүлэхээр төлөвлөж буй төсөл, хөтөлбөрүүдэд хүнд ээлтэй хотын концепцыг хэрхэн тусгах талаар ярилцсан байна.

Дэлхий даяар хотуудын суурьшил, нягтрал улам нэмэгдэж, орон сууцны төлөвлөлтөөс үүдэлтэй иргэний орон зай хумигдаж буй энэ үед хувийн орон зай болон бусадтай зохицохыг хослуулах шаардлагыг хэрхэн төлөвлөх талаар цогц шийдэл дэвшүүлсэн “Зөөлөн хот” номыг тэрбээр бичжээ. Номыг монгол хэлнээ бүс нутаг төлөвлөгч П.Мөнгөнчимэг орчуулсан ба зохиогчийг нь ийнхүү эх орондоо урьж, энэ сарын 19-нд СТӨ-нд болох уг номын нэрээр нэрлэгдсэн фестивалыг зохион байгуулах гэж байна.  Тус фестивальд хүндэт зочин Дэвид Сим өөрийн хот төлөвлөлтийн туршлага, хүнд ээлтэй төлөвлөлтийг бага зардлаар хийх шийдэл зэргийг багтаасан мастер класс лекцээ толилуулах юм. Фестивалийн талаарх дэлгэрэнгүй мэдээллийг “20 минутын хот” Үндэсний хорооны албан ёсны цахим хуудас, Хот төлөвлөлт, барилга, орон сууцжуулалтын цахим хуудас болон Soft city festival фейсбүүк хуудаснаас авах боломжтой.