Аналитик


"Боловсон" цагаан сар

3 жил, 9 сар TIMES.MN
 TIMES.MN долоо хоногийн тойм хүргэж байна. Өнгөрөгч долоо хоногт Монгол түмний уламжлалт баяр сар шинийн баярын өдрүүд тохиож хотол олноороо өргөн дэлгэр тэмдэглэлээ. Баярын өдрүүдэд гудамж талбайд хөлөмцүү, халамцуу хүнгүй, мэргэжлийн байгууллагуудын хувьд ч дуудлага цөөтэй тайван амгалан байсан гэсэн таатай мэдээг албаны хүмүүс мэдээлж байсан юм. Түүнчлэн "Монголчууд баяраа зөв боловсон тэмдэглэж сурчээ" хэмээн сайшаах хүмүүс ч цөөнгүй байлаа. Харин спортын салбарт амжилтаар дүүрэн байж тамирчин Д.Төмөрхүлэг, М.Уранцэцэг нар дэлхийн чансааг тэргүүлж эхэлсэн юм.

Ингээд зарим үйл явдлын дэлгэрэнгүйг хүргэе.

Улсын харцага Ц.Содномдорж түрүүллээ

  Билгийн тооллын XVII жарны “Муу нүүрт” хэмээх гал бичин жилийн сар шинийн баярт зориулсан Улс, аймгийн алдар цолтой 256 бөхийн барилдаанд улсын харцага Ц.Содномдорж түрүүлж, улсын аварга Г.Эрхэмбаяр үзүүрлэв.

Хөвсгөл аймгийн Тосонцэнгэл сумын харьяат "Хилчин" спорт хороо, "Хөвсгөлийн хүчтэн" дэвжээ, "Монос" группийн бөх, улсын харцага Ц.Содномдорж сар шинийн барилдаанд анх удаа шөвгөрөн түрүүллээ. Түүний хувьд 2012 оны сар шинийн барилдаанд шөвгөрч байсан юм. Сэлэнгэ аймгийн Мандал сумын харьяат, ОБЕГ-ын "Аврагч" спорт хороо, "Таванхан" дэвжээ, "Мондэй" группийн бөх улсын аварга Г.Эрхэмбаяр 2013 онд түрүүлж байсан бол энэ жил үзүүрлэлээ.

Их шөвгийн дөрөвт Ховд аймгийн Чандмань сумын харьяат улсын харцага Н.Батзаяа, Увс аймгийн Тэс сумын улсын начин Т.Баасанхүү нар шалгарч үлдсэн юм.

Хурдан морины бүсийн уралдааны 2016 оны хуваарийг тогтоолоо

  Хурдан морины “Дүнжингарав-2016” Төвийн бүсийн хаврын уралдааныг Хаврын тэргүүн сарын 21-нд буюу 2016 оны 2 дугаар сарын 28-нд Төв аймгийн Аргалант сумын Цагаан хөтөлд, Хангайн бүсийн хаврын уралдааныг Өвөрхангай аймагт 3 дугаар сарын 6-ны өдөр тус тус зохион явуулахаар шийдвэрлэлээ.

Мөн Баруун бүсийн уралдаан Говь-Алтай аймагт, Зүүн бүсийнх Хэнтий аймагт, Говийн бүсийнх Өмнөговь аймагт, Хангайн бүсийн уралдаан Орхон аймагт 7 дугаар сарын 30-31-ний өдрүүдэд болно.  Монголын уяачдын баяр-Шигшмэл хурдан морьдын “Их хурд-VII” уралдаан Хүй долоон худагт 2016 оны 7 дугаар сарын 24-нд болно.Хурдан морины уралдааныг тогтоосон хугацаанд дүрмийн дагуу зохион байгуулахыг холбогдох аймаг, нийслэлийн Засаг дарга, Монголын морин спорт, уяачдын холбоонд даалгалаа.

Д.Төмөрхүлэг, М.Уранцэцэг нар дэлхийн чансааг тэргүүлэв

 Сар шинийн өмнө жүдо бөхийн олимпийн эрхийн оноо олгох “Их дуулга” тэмцээн Францын нийслэл Парис хотноо болсон билээ. Тэгвэл энэхүү тэмцээний дараа Олон улсын жүдо бөхийн холбооноос жүдочдын чансааг шинэчлэн гаргалаа. Эрэгтэй, эмэгтэй тус бүр долоо нийт 17 жингээс чансаа гарахад Монголын гурван жүдоч жиндээ тэргүүллээ. Тодруулбал, эрэгтэй 66 кг-д Д.Төмөрхүлэг, эмэгтэй 48 кг-д М.Уранцэцэг, 52 кг-д Д.Сумъяа нар юм. Мөн эрэгтэй 60 кг-д Г.Болдбаатар гуравдугаар, 73 кг-д С.Ням-Очир 10, 90 кг-д Л.Отгонбаатар 11, эмэгтэй 63 кг-д Ц.Мөнхзаяа 7 байрт бичигдэж байна. Харин Казахстан улсын нэрийн өмнөөс барилдаж буй Парисын “Их дуулга”-ын аварга Г.Отгонцэцэг чансаагаа 16 хүртэл өсгөжээ.

Үйлдвэрлэгчид 1 тэрбум төгрөгийн борлуулалт хийжээ

   Үндэсний үйлдвэрлэлээ дэмжих зорилгоор жил бүрийн сар шинийн өмнө Аж үйлдвэрийн яам, Хүнс хөдөө аж ахуйн яам, Нийслэлийн Засаг даргын Тамгын газар хамтран үзэсгэлэн худалдаа зохион байгуулдаг. Энэ жилийн  үзэсгэлэн худалдаа нь өнгөрсөн 2 сарын 27-нд нээгдэж, хоёрдугаар сарын 8 хүртэл үргэлжлэн өндөрлөсөн билээ. Үзэсгэлэн худалдаа нь өнгөрсөн хоёрдугаар сарын 27-нд нээгдэж, хоёрдугаар сарын 8 хүртэл үргэлжлэн өндөрлөсөн. Хүннү молл, “Шөнийн зах”, Хархорин хороолол дахь “Монгол аутлет” худалдааны төвүүдэд тус тус зохион байгуулагдаж  эдгээр  чиглэлд ч нэмэлт автобус үйлчилсэн юм.  Энэ жилийн “Цагаан сар 2016” үзэсгэлэн худалдаанд 450 орчим үйлдвэрлэгчид оролцож, 120 гаруй нэр төрлийн бүтээгдэхүүнээ худалдан борлуулснаар нэг тэрбум төгрөгийн борлуулалт хийсэн байна.

Ээлжит бус чуулганы товыг зарлалаа

   Монгол Улсын Их Хурлын дарга З.Энхболд 2016 оны 02 дугаар сарын 12-ны өдөр Улсын Их Хурлын ээлжит бус чуулган товлон зарлах тухай 25 тоот захирамж гаргалаа. Монгол Улсын Үндсэн хуулийн Хорин долдугаар зүйлийн 3 дахь хэсэг, Монгол Улсын Их Хурлын тухай хуулийн 16 дугаар зүйлийн 16.2, 16.4 дэх хэсгийг үндэслэн гаргасан тус захирамжид Улсын Их Хурлын ээлжит бус чуулганыг 2016 оны 02 дугаар сарын 15-ны өдрөөс 02 дугаар сарын 26-ны өдрүүдэд зарлан хуралдуулж, дараах асуудлыг хэлэлцэхээр заажээ. Дэлгэрэнгүй... эндээс уншина уу.

МАХН, Ногоон намтай хамтрах гэрээ байгууллаа

   Сар шинийн нэгэнд МАХН Монголын Ногоон намтай хамтран УИХ-ын сонгуульд оролцохоор болж, гэрээ байгуулжээ. Сонгуулийн тухай хуулийг шинэчлэн баталснаар УИХ-ын сонгуульд оролцох намуудыг Улсын Дээд Шүүхэд бүртгүүлсэн он дарааллаар нь эрэмбэлж, саналын хуудаст бичихээр болсон. Үүгээр МАХН 18-д эрэмбэлэгдэж байсан бол Монголын Ногоон намтай хамтрах шийдвэр гаргаснаар гуравт бичигдэх боломжтой болжээ.

 Гэртээ ганцаараа байсан хүүхдийн гарыг нь хүлж дээрэмджээ

 БГД-ийн 19-р хороо “ үл таних хүн гэрт орсон байна” гэсэн мэдээллийг 02-р сарын 07-нд цагдаагийн байгууллагад өгчээ. Дуудлага мэдээллийн дагуу цагдаагийн байгууллага очиж шалгахад, тус тоотод суух 12 настай эрэгтэй Т-г гэртээ ганцаараа байхад нь Сэлэнгэ аймгийн Сүхбаатар сумын 2-р багт суух 29 настай эрэгтэй Б гэгч гарыг нь хүлж, манан хөөрөг, ”Samsung” гар утасыг дээрэмдсэн байна. Хэргийг илрүүлэн БГД-ийн цагдаагийн нэгдүгээр хэлтэс шалгаж байна.

Улсын сайн малчин, тэргүүний тариаланчдыг шалгарууллаа

   Энэ онд 21 аймаг, нийслэлээс 140 малчин, 7 фермер, нэг малчдын бүлэг тодорхойлолт ирүүлснээс шалгаруулах журмын харгалзах 75 шалгуур үзүүлэлтийн дагуу дүгнэж, шаардлага хангасан 118 малчныг “Улсын сайн малчнаар” гурван иргэн, нэг хоршоог “Улсын тэргүүний фермер”-ээр шалгарууллаа.


Эдгээр малчид нь удам залгасан сайн малчид төдийгүй мал сүргээ төлөөр нь өсгөж, эрсдэлийг гарз хохиролгүй даван туулж байгаа, сум, орон нутгийнхаа хөгжилд тодорхой хувь нэмэр оруулсан, мал аж ахуйн үйлдвэрлэлд олон жил үр бүтээлтэй ажилласан 33-75 хүртлэх насны хүмүүс юм. Манай улсын хөдөө аж ахуйн салбарт гарсан ололт амжилтын дотор мал сүргийн тоо 56 саяд хүрсэн, малчин өрхийн тоо 9 жил дараалан буурч байсан бол сүүлийн хоёр жилд дараалан өсч, энэ жил 153 мянга болсон зэрэг нь Улсын сайн малчны тоог нэмэгдүүлжээ.

 

Энэ онд тариалангийн салбарт гаргасан амжилт, орон нутгаа хөгжүүлэх үйлсэд оруулсан хувь нэмрийг үнэлж, ажлын амжилтаараа тэргүүлсэн 12 аж ахуйн нэгжийг “Улсын тэргүүний тариаланч хамт олон”-оор, 21 ногоочин, механикжуулагчийг “Улсын тэргүүний тариаланч”-аар шалгарууллаа. Дэлгэрэнгүй... эндээс уншина уу.

 

 Л.Ариун

 

 




Холбоотой мэдээлэл


Хөгжих үү, үлдэх үү?
Хөгжих үү, үлдэх үү?
2 сар, 2 долоо хоног

АНХААРУУЛГА


Уншигчдын бичсэн сэтгэгдэлд times.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.