Дэлхий даяар үйлдвэрлэгдсэн хүнсний гуравны нэг нь хаягдаж байна гэсэн судалгаа бий. Энэ нь жилд 1.3 тэрбум тонн болж байгаа нь дэлхийн хүнсний аюулгүй байдалд нөлөөлж байгаа юм.

Ялангуяа та өлсөх үедээ хөргөгчөө онгойлгоод эсвэл хоолны газраас хоол аваад идчих боломжтой бол энэ талаар илүү бодох хэрэгтэй. Бидэнд олгогдсон энэхүү давуу эрх нь нөгөө талдаа сонголт, хэрэглээндээ ухамсартай хандаж, хариуцлагатай байхыг шаардаж байгаа юм. Herbalife Nutrition-с ургамлын гаралтай хоолны дэглэмийн талаар судалгаа явуулахад оролцогчдын 40 хувь нь байгаль орчинд ээлтэй байхыг хүсдэг тул уг сонголтыг хийдэг гэсэн байна.

Хүнс ногоо хуучирч муудах дөхсөн үед хаяхын оронд:

Хүнсний ногоог шөлөнд ашиглах

Талхыг франц маягаар шарах

Жимсээр чанамал эсвэл соус бэлдэх

Жимс, ногоог холигчид хийж смүүти бэлдэх боломжууд бий.

Гэр бүлийнхээ хоолыг төлөвлөхдөө хүнсний хаягдлыг багасгаж, илүү ухаалаг амьдрах 5 арга бий.

1. УРЬДЧИЛАН ТӨЛӨВЛӨХ

Та ирэх долоо хоногийн хоолны цэсээ эсвэл гэртээ зочин урихаар төлөвлөж байгаа бол зочиддоо зориулан зөвхөн идэж чадах хэмжээгээр нь урьдчилан тооцоолж, бэлтгэх хэрэгтэй.

2. ХООЛНЫ ОРЦ НАЙРЛАГЫГ АНХААРАХ

Хүмүүс байгаль орчин, эрүүл мэнд, жингийн илүүдэл зэрэг асуудлаас үүдэн ургамлын гаралтай хоол хүнсийг илүүд үзэх болсон. Гэхдээ хоолны дэглэмдээ өөрчлөлт оруулахаар төлөвлөж байгаа хүмүүсийн хувьд хооллолтын гол хувийг ургамлын гаралтай хүнс эзлэх хэдий ч заримдаа мах, шувууны мах, загас зэргийг сонгож болдог “уян хатан” хоолны дэглэмийг эхлээд сонгох нь зүйтэй. Энэ нь улаан мах үйлдвэрлэхэд зарцуулах эрчим хүч, нөөцийг багасгах замаар байгаль орчиныг хамгаалахын зэрэгцээ эрүүл тэнцвэртэй хооллолтыг хадгалахад тусална.

3. ХООЛЫГ ШИРЭЭН ДЭЭР ХУВААРИЛАХ БУС ГАЛ ЗУУХНЫ ӨРӨӨНД ТАВАГЛАХ

Хэрвээ хоолны порцыг хүн бүрт тохируулахын тулд дунд нь тавьж үйлчилдэг бол энэ нь порцыг хянах тийм ч сайн арга биш юм. Хог хаягдлын хамгийн том эх үүсвэр нь идэлгүй үлдээсэн хоол хүнс байдаг. Тийм учраас тохирох порцоор хүн бүрт таваглан хүртээхийг зориорой.

4. ХУГАЦАА НЬ ДУУСАХ ДӨХСӨН ХҮНСНИЙ БҮТЭЭГДЭХҮҮНИЙГ ӨӨР АРГААР АШИГЛАХ

Хурдан мууддаг хүнсний бүтээгдэхүүнийг үр дүнтэй ашиглах олон арга бий. Улаан лооль салат хийхэд тохиромжгүй зөөлөрсөн бол гэрийн аргаар болгосон улаал лоолийн соус хийх талаар бодож үзээрэй. Гадил гаднах хальс нь борлож, доторх нь нялцайж зөөлөрсөн үед хөргөгчинд хөлдөөж, дараа нь хальснаас нь салган смүүтинд хийгээрэй. Шөл болон битүү чанасан махны соусанд бага зэрэг хугацаа нь хэтэрсэн ногоог ашиглан гайхалтай хоол бэлдэх боломжтой.

5. ХЭРЭГТЭЙ ХҮМҮҮСТ НЬ ХАНДИВЛАХ

Хөгжингүй орнуудад илүү гарсан, хугацаа нь дөхсөн хүнсний бүтээгдэхүүнийг хандивлах олон буяны байгууллагууд байдаг. Та ч мөн илүү гарсан хүнсээ ядарсан хөршдөө өгөх боломжтой бол өгч, эсвэл дараагийн удаа илүүдэл гаргахгүйн тулд худалдаж авах хэмжээндээ анхаарлаа хандуулаарай.

Хүнсний хог хаягдлыг бууруулах байгаль дэлхийдээ ээлтэй амьдрах 5 арга

Сэтгэгдэл