Баярын үеэр хэт их идэхээс хэрхэн сэргийлэх вэ?
Баяр ёслолыг найз нөхөд, гэр бүл, амтат хоол зуушгүйгээр төсөөлөхийн аргагүй. Гэхдээ баярын амтлаг хоол зууш нь илчлэг ихтэй ч шаардлагатай шим тэжээлээр дутмаг байдаг. Тийм ч учраас эрүүл бус амттан, хоол хүнснээс татгалзах арга бол уургийг түлхүү идэж, ашиггүй нүүрс ус, өөх тосыг бууруулах явдал юм. Уураг нь цатгалан мэдрэмжийг төрүүлдэг учраас бага идэж, эрүүл бус хөнгөн зуушнаас татгалзахад тусалдаг.
Уургийн үүрэг
Уураг нь булчингийн массыг барьж, хадгалахад туслахаас гадна сэтгэл ханамжийг нэмэгдүүлдэг. Хоол, хөнгөн зууш бүртээ бага зэрэг уураг оруулах нь өдрийн турш өлсгөлөнг бууруулахын зэрэгцээ өдөрт авах уургийн хэрэгцээг /хүний нас, биеийн жин, хөдөлгөөний түвшнээс хамааран өөр өөр байдаг/ хангахад тусалдаг. Мах, шувууны мах, өндөг, буурцагт ургамал, үрээр баялаг хоол хүнс нь В, Е бүлгийн амин дэм, төмөр, цайр, магни зэргээр хангадаг. Тиймээс та хоосон калорийн хэрэглээгээ багасгахын зэрэгцээ уураг нэмж хэрэглэснээр бие махбоддоо шаардлагатай нэмэлт шим тэжээлийн ашиг тусыг хүртэх болно.
БАЯРЫН ҮЕЭР ХЭТРҮҮЛЭН ИДЭХЭЭС ХЭРХЭН ЗАЙЛСХИЙХ ВЭ?
Уургаар баялаг, эрүүл өглөөний цайгаар өдрийг эхлүүлээрэй (ойролцоогоор 25 гр уураг). Үр тарианы бэлэн өглөөний цайны оронд хоол орлуулах коктейль эсвэл уургийн нунтагийг овьёосны зутанд нэмж идээрэй. Судалгаанаас үзэхэд уургаар баялаг өглөөний цай нь үдийн хоол хүртэл цатгалан байлгаад зогсохгүй өдрийн турш хэтрүүлэн идэхээ хязгаарлахад тусалдаг.
Тэжээллэг зууштай хослуулах
Баярын арга хэмжээнд хоосон ходоодтой очихгүй байхыг хичээгээрэй. Явахаасаа өмнө элдэв нэмэлтгүй Грек тараг эсвэл тослоггүй бяслагийг жимстэй идэх юм уу уургийн хөнгөн зууш идээрэй. Мөн давсгүй ууталсан самар, уургийн батончик зэргийг цүнхэлж авч явж болно.
Баярын хоолны сонголтонд анхаарлаа хандуулах
Хоолны ширээн дээрх оройн зоогноос аль болох шарсан загас, шувуу, өөхгүй мах эсвэл цагаан хоолтны уургийн эх үүсвэр болох буурцаг, сэвэг зарам зэргийг сонгож илчлэг ихтэй сүмс, хоолны амтлагчыг хэтрүүлэлгүй хэрэглээрэй. Мөн цардуул ихтэй цагаан будаа, талх, төмс зэргийн оронд олон төрлийн ногоо, салат, уургаар баялаг шош, сэвэг зарам, киноа, бор будаа, бүхэл үрийн паста зэргийг сонгоорой. Баярын ундаа нь маш их илчлэг агуулсан байдаг тул “Шингэн илчлэг”-ээ ажиглаарай. Газтай усыг нимбэгтэй уух нь баярын уур амьсгалыг төрүүлдэг ч илчлэггүй байдгаас гадна цангаагаа тайлахад тань тусална.
Та баярын амттанаас нэг мөсөн татгалзахын оронд шоколадны жигнэмэг гэх мэт жилийн туршид идэж болох энгийн амттанг алгасч баяртай холбоотой, жишээлбэл цагаан гаатай боов зэрэг амттангаас тохируулан идээрэй. Дасгал хөдөлгөөнөө хийхээ бүү мартаарай. Сайхан харагдахад тань туслахаас гадна эерэг мэдрэмжийг төрүүлнэ.
Сэтгэгдэл