Аналитик


Т.Лхагвасүмбэрэл агсны үхлийн шалтгаан эргэлзээ төрүүлэв үү...

3 жил, 10 сар TIMES.MN
TIMES.MN таньд долоо хоногийн үйл явдлын дэлгэрэнгүйг хүргэе. Өнгөрөгч өдрүүдэд үйл явдлаар дүүрэн долоо хоног болж өнгөрлөө. Дотоодын үйлдвэрлэгч, төрийн хамтарсан дотоодын хөрөнгө оруулагчдыг дэмжсэн зөвөлгөөн амжилттай боллоо. Мөн цагдаагийн ерөнхий газраас Т.Лхагвасүмбэрэлийн үхлийн шалтгааныг тогтоосон нь иргэдийг эргэлзээнд оруулсан бөгөөд Б.Баатарын алдагдсан бичлэгт гэмт хэргийн шинжтэй мэдээлэл байна хэмээн үзэж шалгахаар болсон. Ингээд зарим үйл явдлын дэлгэрэнгүйг хүргэе.

 


Эдийн засаг: " Дотоодын үйлдвэрлэл, борлуулалтыг дэмжих төр, үйлдвэрлэгчдийн зөвөлгөөн”-ийг зохион байгууллаа


   Зөвлөгөөний үеэр дотоодын үйлдвэрлэгчид эдийн засаг, хууль эрх зүйн орчинд тулгамдаж буй асуудлаа хэлэлцэн, санал бодлоо солилцлоо. Зөвлөгөөнд УИХ-ын гишүүд, Засгийн газрын гишүүд, төрийн байгууллагууд, үндэсний үйлдвэрлэгчид, мэргэжлийн холбоод болон орон нутгийн төлөөлөл оролцож байна. Тус зөвлөгөөнд Ерөнхийлөгч Ц.Элбэгдорж үг хэлсэн юм. Уг зөвлөлгөөнд ажил олгогч эздийн холбооныхон мөн оролцож үйлдвэрлэл эрхлэгчдэд зээл олгохдоо хүүг багасгах саналыг мөн гаргаж байв. Дэлгэрэнгүй...эндээс уншина уу.


Чуулган:  Найман хувийн зээлийг үргэлжлүүлэхийг дэмжлээ


  УИХ-ын чуулганы хуралдаанаар Иргэний хуульд нэмэлт оруулах тухай болон Үл хөдлөх эд хөрөнгийн барьцааны тухай хуульд өөрчлөлт оруулах тухай хуулийн төслүүдийг хэлэлцэх эсэхийг хэлэлцэж дэмжсэн юм. Ингээд Хууль зүйн байнгын хороонд уг хуулийн төслүүдийг шилжүүлэн өгч УИХ-ын чуулганы нэгдсэн хуралдааны дараа байнгын хороогоор хэлэлцлээ. Байнгын хорооны гишүүдийн зүгээс уг хуулийн төсөлтэй холбоотой саналаа хэлсний дараа анхны хэлэлцүүлгээр нь дэмжлээ.

Хүүхдийн мөнгийг хүүхэд бүрт олгох төслийг дэмжлээ

УИХ-ын чуулганы нэгдсэн хуралдаанаар Хүний хөгжил сангийн тухай хуульд өөрчлөлт оруулах тухай УИХ-ын тогтоолын төслийг хэлэлцэн гишүүдийн 90.5 хувийн саналаар дэмжин, анхны хэлэлцүүлэгт шилжүүллээ.

Засгийн газар 2016 оны төсвийн хуулийг өргөн мэдүүлэхдээ хүүхдийн 20 мянган төгрөгийг зорилтот хэсэгт хүргэхээр болж, төсвөө батлуулж байсан.

Харин хоёр сар орчмын дараагаас хүүхэд бүрт 20 мянган төгрөг олгохоор болж, дээрх хуульд өөрчлөлт оруулах төслийг өргөн мэдүүлсэн нь энэ юм. Гэхдээ 2016 оны төсвийн тодотголыг цугт нь өргөн мэдүүлээгүй нь дээрх тогтоолыг баталлаа ч хуулиа давахгүй гэж үзэх гишүүн цөөнгүй байлаа.

Нийгэм: "Нийслэлийн үйлчилгээний нэгдсэн төв" нээлтээ хийлээ

Төрийн үйлчилгээг нэг дороос шуурхай хүргэх, үйлчилгээний чанарыг сайжруулж, хүртээмжийг нэмэгдүүлэх нь Засгийн газрын гол зорилт. Энэ зорилтын хүрээнд төр, иргэн, аж ахуйн нэгжээ ойртуулах, иргэдийн санал хүсэлтийг сонсох “11 11” төвийг байгуулсан. Төрийн 25 үйлчилгээг цахимаар хүргэх 108 ширхэг  ТҮЦ машиныг суурилуулсан. Эдгээр ажлын үргэлжлэл болж “Нийслэлийн үйлчилгээний төв” өнөөдөр нээлтээ хийж байна гэж Ерөнхий сайд Ч.Сайханбилэг хэллээ. Нээлтийн ажиллагаанд Нийслэлийн Иргэдийн төлөөлөгчдийн хурлын дарга Д.Баттулга, Нийслэлийн Засаг дарга бөгөөд Улаанбаатар хотын Захирагч Э.Бат-Үүл нар оролцон үг хэлж, нээлтийн тууз хайчиллаа.

Нийгэм: Т.Лхагвасүмбэрэл агсны үхлийн шатгааныг тайлбарлалаа

    "Дэлхийн Ирвэс хамгаалах сан"-ийн биологич Т.Лхагвасүмбэрэл агсны амиа алдсан талаар өнөөдөр ЦЕГ-аас мэдээлэл хийсэн.

Энэ үеэр Улсын Мөрдөн байцаах газрын дэд дарга Э.Идэрцог "2015.11.05-ны өдөр түүнийг алга боллоо гэсэн мэдээлэл ар гэрийнхэнээс нь ирүүлсэн. Ингээд 2015.11.11-ний өдөр түүний машиныг олсон. Хэргийн газар үзлэг хийхэд 5-6 удаагийн камерийн бичлэг үлдсэн байгааг шалгасан.

Автомашины үзлэгээр хоёр гар утас олдсон бөгөөд бичлэгтэй гар утас, 0.5 литрийн хэмжээтэй сархад байсан. Талийгаачийн цогцос Хөвсгөл далайн 25 метрийн гүнээс олдсон. Түүнийг живэлтийн улмаас нас барсан бөгөөд хөнгөн зэргийн согтолттой байсан гэсэн шинжилгээний хариу гарсан.

Энэ хэргийг хэрэгсэхгүй болгоогүй. Одоо ч үргэлжлүүлэн шалгаж байгаа. Тост, Тосон бумбын нуруунд лицензтэй 16 аж ахуйн нэгжийг мөрдөн байцаалтаар шалгаж байна" гэсэн юм.

Нийгэм: Б.Баатарын бичлэгт гэмт хэргийн шинжтэй мэдээлэл байна гэж үзжээ

  Цагдаагийн ерөнхий газрын мэдээлэл, технологийн төвөөс  өнгөрсөн Лхагва гаригт мэдээлэл хийсэн билээ.

ЦЕГ-ын хэвлэл мэдээллийн төвийн дарга  Б.Баатархүү "Херо Энтертаймэнтийн захирал Б.Баатар архивынх нь бичлэг алдагдсныг шалгуулах хүсэлтээ одоог хүртэл  өгөөгүй байна. Хүсэлт өгсөн, өгөөгүй цахим сүлжээгээр   гэмт хэргийн шинжтэй мэдээлэл цацагдсан   учраас шалгалтын ажиллагаа явуулна" гэсэн юм. 

Гоё Монгол: Б.Үйзэнмаа Германы Баварийн кино урлагийн дээд шагнал авлаа

  Монгол эмэгтэй, Борхүү зураачийн охин Үйзэнмаа Германы Баварийн кино урлагийн дээд шагналийг өсвөр залуу үеийн найруулагч зэрэглэлээр "Над руу ингэж битгий хар" киногоороо авлаа. Түүний шагнал авахдаа "Би эрх чөлөөтэй хүн. Яагаад гэвэл би хүнийг үзэн яддаггүй" гэж хэлсэн жинтэй үг нь германуудыг үнэхээр догдлуулсан байна.. Б.Үйзэнмаадаа баяр хүргэж улам их амжилт хүсье!




Холбоотой мэдээлэл


Хөгжих үү, үлдэх үү?
Хөгжих үү, үлдэх үү?
2 сар, 2 долоо хоног

АНХААРУУЛГА


Уншигчдын бичсэн сэтгэгдэлд times.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.