Нийгэм


Баян-Өлгий аймагт 530 айл өрхийн 2512 хүн гамшигт нэрвэгдээд байна

1 сар TIMES.MN

Онцгой байдлын ерөнхий газраас Зам тээврийн хөгжлийн яам, Цаг уур орчны шинжилгээний газартай хамтран үер, усны нөхцөл байдлын талаар хэвлэлийн бага хурлыг өнөөдөр хийлээ.

   Хэвлэлийн бага хуралд ОБЕГ-ын тэргүүн дэд дарга, бригадын генерал Г.Ариунбуян, дэд дарга, хурандаа Ц.Ганзориг, Гамшгийн шуурхай удирдлагын газрын дарга, хурандаа Б.Мандахгэрэл, НОБГ-ын дарга, хурандаа Ж.Чүлтэмсүрэн болон Зам тээврийн хөгжлийн яамны замын ашиглалт, засварын хэлтсийн дарга Х.Оргил-Эрдэнэ, Зам тээврийн хөгжлийн яамны Зам, тээврийн хяналтын хэлтсийн дарга С.Дорждагва, ЦУОШГ-ын ерөнхий технологич, инженер Ч.Сарантуяа нар оролцсон юм.

Он гарсаар усны ослоор 48 хүн амь насаа алдаад байна 

   Он гарсаар 07 дугаар сарын 18-ны өдрийн байдлаар 13 аймгийн 29 сум, нийслэлийн 4 дүүрэгт гол, мөрөн, нуур, цэвэр, бохир усны шугам, тогтоол ус, худгийн ус, хиймэл нууранд 40 удаагийн тохиолдлоор 48 хүн амь насаа алдсан байна. Үүнээс 9 нь хүүхэд, 39 нь насанд хүрэгсэд байгаа юм.  Усны ослын гол шалтгаан нь бага насны хүүхдийг хараа хяналтгүй орхидог, гол, усны орчим орхиод эцэг эхчүүд архидан согтуурдаг, хүүхэд, залуучууд сэрүүцэх болон тоглох зорилгоор ус руу ордог, насанд хүрэгсэд гол, усанд орохдоо согтууруулах ундаа хэрэглэж өөрийгөө болон бусдыг хянах чадвараа алддаг, хиймэл нууранд хийлдэг гудастай орсны улмаас осолдсон, худгийн усанд малаа унахаар араас нь ороод осолдсон, үерийн ус зайлуулах далангаар урсаж байгаа ус руу хөл алдан унаж осолдсон зэргээс үүдэж байна.

 Мөн Цаг уурын байгууллагаас ирүүлсэн мэдээгээр 07 дугаар сарын 17-нд  баруун болон төвийн ихэнх нутаг, 18-20-нд баруун, төв, зүүн аймгуудын ихэнх нутаг, говийн аймгуудын зарим нутгаар, 21-22-ны өдөр баруун, төв, зүүн аймгуудын зарим нутгаар, 24-26-ны өдөр баруун, төв, говийн аймгуудын зарим газраар үе үе аянга цахилгаантай усархаг аадар бороо, мөндөр орох, Хангай, Хөвсгөл, Хэнтэйн уулсаас эхтэй гол, мөрний усны түвшин огцом нэмэгдэх, үер буух өндөр эрсдэлтэй байна.Иймээс үерийн аюулаас урьдчилан сэргийлэхийг иргэд, аж ахуйн нэгж, байгууллагад анхааруулж байна.

Түүнчлэн,

-Иргэд, аж ахуйн нэгж байгууллага аялал зугаалгаар явахдаа нэгдсэн зохион байгуулалттай явж, архи согтууруулах ундаа хэтрүүлэн хэрэглэхгүй байх

-Гол усны ойролцоо амарч зугаалахгүй байх

-Бороотой, гол мөрний усны түвшин нэмэгдсэн үед баталгаатай гүүр, гарам, гарцтай газраар автомашинтай зорчих

-Хүүхдийг гол усны эрэг дагуу явуулж, тоглуулахгүй байх, хүүхдэд тавих хараа, хяналтаа сайжруулах

-Голуудын  усны түвшин буураагүй байгаа голын усанд орох /тогтоол ус/, сэлэх, голын эрэг дагуу удаан хугацаагаар байрлахгүй байхыг онцгойлон  анхааруулж байна.

Ажлын хэсэг Баян-Өлгий аймагт ажиллаж байна

     Баян-Өлгий аймгийн нутаг дэвсгэрт 2018 оны 07 дугаар сарын 14-16-ны өдрүүдэд орсон усархаг аадар борооны улмаас Өлгий сумын 2, 3, 4, 9, 11, 12, 13 дугаар багийн 530 айл өрхийн 2512 хүн гамшигт нэрвэгдэж, гэр, байшин, хашаа, хороо нь усанд автсан бөгөөд 225 өрхийн 1566 хүнийг аюулгүй газарт гаргаж, 185 өрхийн 668 иргэнийг 8 байрлалд тор хоргодох байраар ханган, 58 өрхийг нүүлгэн шилжүүлж, 5.0 км далан босгож, 300 м шуудуу татан,  эрүүл мэндийн салбар иргэдийг эрүүл мэндийн үзлэгт бүрэн хамруулах үйл ажиллагааг зохион байгуулж 82 өрхийн 177 иргэнд эрүүл мэндийн анхан шатны үйлчилгээ үзүүлж, 60 хүнд эм бэлдмэл тараагаад байна.

Тухайн суманд үүссэн гамшгийн аюулаас иргэдийн амь нас, эрүүл мэндийг хамгаалах, хойшлуулшгүй сэргээн босгох ажиллагааг хэрэгжүүлэхээр давхардсан тоогоор тус аймгийн Онцгой байдлын газрын 96, Цагдаагийн газрын 149 алба хаагч, Мэргэжлийн хяналтын газрын 23, Газрын харилцаа, барилга хот байгуулалтын газрын 10, Зам засвар, арчлалтын “Жол” ХХК-ийн 23 ажилтан, орон нутгийн 105 иргэн, Ховд аймгийн Онцгой байдлын газрын 9, Увс аймгийн Онцгой байдлын газрын 5, Говь-Алтай аймгийн Онцгой байдлын газрын 7, Завхан аймгийн Онцгой байдлын газрын 9, Зэвсэгт хүчний 340 дүгээр ангийн 92, Зэвсэгт хүчний 311 дүгээр ангийн 35, Хилийн цэргийн 0165 дугаар ангийн 55 алба хаагч, нийт 618 хүн, 107 нэгж техник хэрэгсэлтэйгээр ажиллаж байна.

Түүнчлэн тус аймгийн нутаг дэвсгэрт болсон үерийн гамшгийн нөхцөл байдалтай танилцах, төрийн захиргааны болон нутгийн захиргааны байгууллага, гамшгаас хамгаалах албадын үйл ажиллагааг уялдуулан зохицуулах, Улсын онцгой комиссыг мэдээллээр хангах зорилгоор Онцгой байдлын ерөнхий газрын Гамшгаас урьдчилан сэргийлэх газрын дарга, хурандаа Д.Батсайханаар ахлуулсан шуурхай ажлын хэсэг ажиллаж байгаа юм.

Мөн Сүхбаатар аймгийн нутгаар 07 дугаар сарын 16-ны өдөр бороо орж, үер буусны улмаас Уулбаян суманд 1 гэр, Түвшинширээ суманд 6 гэр, 2 автомашин үерийн усанд урсаж, Мөнххаан сумаас 44 км-т, аймгийн төвөөс 144-150 км-т улсын чанартай автозамын далан усанд урсан, хатуу хучилттай замд цөмрөлт үүссэн. Төв аймгийн Зуунмод суманд 3 настай эрэгтэй хүүхэд үерийн ус зайлуулах шуудуу руу унасныг аварч эмнэлгийн байгууллагад хүлээлгэн өгсөн, далан, суваг, шуудуу сэтэрч 28 айл өрхийн гэр, байшин усанд автсан,  Тус аймгийн Борнуур суманд 2018 оны 07 дугаар сарын 16-ны өдөр орсон усархаг аадар борооны улмаас үер бууж 1 дүгээр багийн нутаг дэвсгэрт 70 айл өрх, 10 аж ахуйн нэгж, байгууллага усанд автан, 15 бог мал хорогдон, 3 айл өрхийг нүүлгэн шилжүүлж, сумын нутаг дэвсгэр дэх орон нутгийн чанартай “Шавартайн” гүүр (Улаанбаатар хотоос 100 км-ийн зайтай)-ийн тулгуур баганад суулт үүсч тээврийн хэрэгсэл зорчих боломжгүй болсон, сумын төвийн хатуу хучилттай 530 км зам эвдэрсэн учраас аймгийн “Төв АЗЗА” ХХК, “Баянчандмань” ХХК Улаанбаатар-Дархан чиглэлийн улсын чанартай автозамын Борнуур сумын “Урьхан” орчмын автозамд үүссэн лаг шороо, хог, чулууг цэвэрлэж, сэтэрсэн далан, эвдэрсэн замыг сэргээн засварлах ажлыг гүйцэтгэж байна.

   Онцгой байдлын байгууллагаас үерийн аюулаас урьдчилан сэргийлэх чиглэлээр аймаг, нийслэлийн онцгой байдлын байгууллагад үерийн далан, суваг, шуудуу татах, сэргээх, засварлах, цэвэрлэх, голын арал, тохой, томоохон гол, нуурын эрэг дагуу, уулын усны буулт, жалга судгийн аманд зусаж байгаа айл өрхүүдэд мэдэгдэл хүргүүлэх, аюулгүй газарт нүүлгэн шилжүүлэх, усны осол ихээр болдог газруудад анхааруулах тэмдэг, тэмдэглэгээг байршуулах, бага насны хүүхдийг гол, мөрөн, нуур, тогтоол устай газар хараа хяналтгүйгээр орхихгүй байх, болзошгүй гамшгийн аюулаас амь нас, эрүүл мэндээ хамгаалах талаар иргэдэд зориулсан мэдээлэл, сурталчилгаа хийх, барилга, байгууламж, шатахуун түгээх станцын аянга зайлуулагчийг шалгах, гамшгаас хамгаалах орон нутгийн албадын бэлтгэл бэлэн байдал (автомашин, техник хэрэгсэл, шатахуун, хүн хүчний томилгоо)-ыг хангаж ажиллаж байна гэж Онцгой байдлын ерөнхий газраас мэдээллээ.

 



Холбоотой мэдээлэл


АНХААРУУЛГА


Уншигчдын бичсэн сэтгэгдэлд times.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.