Өглөөний цайгаа алгасах нь ямар сөрөг үр дагавартай вэ?
Өглөөний цай нь өдрийн хамгийн чухал хоол болох талаар та олон эх сурвалжаас уншиж байсан байх. Энэ нь шөнөжин мацаг барьсаны дараа мацгаа өглөөний цайгаар тайлж байгаатай холбоотой. Тиймээс өглөөний цайг хойшлуулж, алгасах нь олон сөрөг нөлөөг дагуулдаг.
ЖИН НЭМЭХЭД НӨЛӨӨЛДӨГ
Та сүүлийн үед ямар нэг шалтгаангүйгээр жин нэмж байгаа бол тогтмол өглөөний цайгаа уухгүй байгаатай холбоотой байж болох юм. Өглөөний цайгаа уухгүй байх нь жин нэмэхэд нөлөөлдөг. Учир нь та шөнөжин өлсөж, өглөө нь хоол идэхээс зайлсхийвэл бие организм чихэрлэг, өөх тостой хоолонд шунаж эхэлдэг. Түүнчлэн өлсгөлөн нүүрлэх үед илчлэгийн тоог үл харгалзан, олдсон зүйлээ хэтрүүлэн идэх хандлагатай байдаг.
ТОЛГОЙ ӨВДӨЛТИЙН ШАЛТГААН БОЛДОГ
Шөнө удаан мацаг барьдаг тул таны бие дэх сахарын хэмжээ өглөө нь буурсан байдаг. Хэрвээ та өглөөний цайгаа алгасвал биед шаардлагатай сахарын хэмжээг нөхөхийн тулд бие нь тодорхой даавар ялгаруулдаг. Энэ процессыг гипогликеми гэж нэрлэдэг. Уг процесс нь сахарыг тогтворжуулдаг боловч сөрөг нөлөөтэй. Уг урвалын явцад цусны даралт огцом нэмэгдэж, энэ нь толгой өвдөх, мигрень үүсгэдэг.
БОДИСЫН СОЛИЛЦООГ УДААШРУУЛДАГ
Өглөөний хоолоо алгасах үед түлшээ хадгалахын тулд бие залхуу горимд шилжиж бодисын солилцоо удаашрахад хүрдэг. Бүтэн шөнө хоол идэлгүй мацаг барьсанаар биеийн калори шатаах чадварыг бууруулж, улмаар өөх тос хуримтлагддаг. Гэсэн хэдий ч өглөө сайн хооллох нь бодисын солилцоог идэвхжүүлж, жингээ хасахад тусалдаг. Өглөөний цайгаа тогтмол уудаг хүмүүсийн бодисын солилцоо өндөр байдгийг баталсан олон судалгаа байдаг.
ҮС УНАЛТЫГ ӨДӨӨЖ БОЛНО
Өглөөний цайгаа алгасах нь үс унахад хүргэдэг гол хор хөнөөлийн нэг. Маш бага хэмжээний уураг агуулсан хоол хүнс нь бие дэх кератины түвшинд сөрөг нөлөө үзүүлдэг. Кератины хангалтгүй байдал нь үс уналтыг өдөөж, ургалтыг зогсоох аюултай. Тиймээс өглөөд уургаар баялаг өглөөний цай уух нь үсний эрүүл мэндэд чухал ач холбогдолтой.
ХОРТ ХАВДАР ТУСАХ ЭРСДЛИЙГ НЭМЭГДҮҮЛДЭГ
Хэрэв та өглөөний цайгаа алгасвал өдрийн турш хоолонд дурлах байдал ажиглагддаг. Энэ нь эргээд таргалах эрсдэлийг нэмэгдүүлдэг. Их Британийн Хавдар судлалын хүрээлэнгийн хийсэн судалгаагаар таргалалттай хүмүүсийн хорт хавдар тусах эрсдэл өндөр байдаг нь тогтоогджээ.
Сэтгэгдэл