Улс төр


Сайдад нэр дэвшигчдийн тархи хэтэвчний нимгэн зузаан иймэрхүү

4 жил, 10 сар TIMES.MN

Шийдлийн Засгийн газрын танхим өнөөдрөөс бүрдэж байна. МАН-ын зургаан сайдын оронд АН,  Шударга ёс эвслийн бүлгээс  тус бүр гурван сайд тодруулсан. Өнөөдөр үдээс өмнө хуралдсан байнгын хороодын хуралдаанаар  ногоон гэрэлээр явж ирсэн нэр дэвшигчид чуулганы хуралдааны босго алхлаа. Чуулганы босго ч нэр дэвшигчдэд хатуу байхгүй нь.  Нэгэнт улстөрийн тохироо хийчихсэн хойно хүссэн хүсээгүй өөр сонголтгүйгээр сайд нар томилогдоно. Зарим нэр дэвшигчдийн тухайд цахим ертөнцөөр хатуухан шүүмжлэл өрнөж байгаа ч улстөрчдийн тохиролцсон асуудалд ямар ч нөлөө үзүүлэхгүй. Харин шинэхэн сайд нар УИХ-ын сонгууль хүртэл 9 сарын хугацаанд ямар ажил амжуулах вэ?

Салбар, ажилтай танилцана, зарим нэг албан тушаалд намынхаа дэмжигчдийг оруулахын тулд халаа сэлгээ хийнэ. Үүнээс болж хэл ам, цаашлаад шүүх болно. Маргаан сонгууль хүртэл үргэлжлэх нь ойлгомжтой. Ингэж байтал шинэ жил, цагаан сар гээд баярууд цуварна. Хавар болоход сонгуулийн уур амьсгал хэдийнэ эхэлсэн байх тул бүгд нэр дэвшихээр намынхаа ажилд  идэвхтэй оролцоно. Амбиц хоолойн дээр тулчихсан байхад юун улсын ажил болох биз. Ингээд бодохоор шинэ сайд нарт ажил хийх цаг хугацаа байна уу гэмээр.

Ямар боловч Ч.Сайханбилэг сайн муу хэлүүлсэн  сайд нараа батлуулж танхимынхаа цоорхойг нөхөх нь. Ажил хийх гэж ирсэн  үү,  нам фракцийн даалгавар биелүүлэх гэж ирсэн үү гэдгийг ирэх 9 сард харагдах биз.  АН, МАХН-аас  чамгүй хугацаанд шигшигдэж гарч ирсэн  гэх сайдад нэр дэвшигчдын тархи болон хэтэвчний нимгэн зузааныг шинжихүй.


 

Барилга хот байгуулалтын сайдад нэр дэвшигч З.Баянсэлэнгэ


1991 онд Нийслэлийн 35 дугаар дунд сургууль, 1994 онд Дархан хотын АУДуСургуулийг бага эмч мэргэжлээр, 2003 онд Цагдаагийн академийг эрх зүйч мэргэжлээр тус тус төгссөн. Тэрбээр 1996-1999 онд НЦГУТ-д бага эмч, 2003 онд Сүхбаатар аймгийн цагдаагийн хэлтэст хэрэг бүртгэгч, 2003- 2006 онд Нийслэлийн Баянзүрх дүүргийн цагдаагийн хэлтэст хэрэг бүртгэгч, 2007-2008 онд Хэрэглэгчдийн эрх ашгийг хамгаалах нийгэмлэгт арбитрч, 2008-2009 онд Нийслэлийн Чингэлтэй дүүргийн 17 дугаар хорооны Засаг даргаар тус тус ажилласан байна. З.Баянсэлэнгэ Улсын Их Хурлын 2012 оны зургаа дахь удаагийн сонгуулиар “МАХН-МҮАН”-ын "Шударга ёс" эвслээс нэр дэвшин Улсын Их Хурлын гишүүнээр сонгогдож, Улсын Их Хурлын Нийгмийн бодлого, боловсрол, соёл, шинжлэх ухааны байнгын хорооны даргаар томилогдон ажиллаж байв. Англи, орос хэлтэй.


Хөдөлмөрийн сайдад нэр дэвшигч Г.Баярсайхан


1988 онд Дорнод аймгийн Сүмбэр сумын 10 жилийн дунд сургууль, 1997 онд Анагаах ухааны их сургуулийг төгссөн. Хүний их эмч мэргэжилтэй. Доктор /Ph.D/ цолтой. Тэрбээр 2006-2008 онд “ Экологи”ХХК-ний захирал, 2008 онд Монголын экологийн зөвлөлийн тэргүүнээр ажиллаж байсан. Улмаар 2008-2012 онд Улсын Их Хурлын гишүүнээр сонгогдон ажилласан. Улсын Их Хурлын 2012 оны зургаа дахь удаагийн сонгуулиар Монгол Улсын Их Хурлын гишүүнээр дахин сонгогдож, 2012-2014 оны 12 сар хүртэл Монгол Улсын Их Хурлын Байгаль орчин, хүнс, хөдөө аж ахуйн байнгын хорооны даргаар сонгогдож ажилласан. Англи орос хэлтэй.


БОНХАЖ-ын сайдад нэр дэвшигч Н.Батцэрэг


1976 онд ЕБДСургууль, 1982 онд ЗХУ-ын Свердловск хотын УПК, 1992 онд Улс төрийн боловсролын академи тус тус төгссөн. Тэрбээр, 1982-1989 онд Ерөнхий боловсролын дунд сургуулийн багш, эрхлэгч,1990-1992 онд Завхан аймгийн Ардын депутатуудын хурлын гүйцэтгэх захиргаанд хэлтсийн дарга, 1992-1996 онд Аймгийн Монголын Үндэсний Ардчилсан Намын дарга, 1996-2000 онд Монгол Улсын Их Хурлын гишүүн, 1999-2000 онд Монгол Улсын Их Хурлын Байгаль орчин, хөдөөгийн хөгжлийн байнгын хорооны даргаар ажиллаж байв. Тэрбээр 2000-2003 онд Хувийн хэвшлийн салбарт компанийн зөвлөх, захирал, 2003-2004 онд Налайх дүүргийн Ардчилсан намын дарга, 2005-2006 онд Боловсрол, соёл, шинжлэх ухааны сайдын зөвлөх, 2006-2007 онд Шадар сайдын ажлын албанд зөвлөх, 2007-2008 онд Монгол Улсын Сангийн дэд сайд, 2009-2012 онд Монголын Үндэсний Ардчилсан Намын дэд дарга, Ерөнхий нарийн бичгийн даргаар ажиллаж ирсэн. 2012 оноос Монгол Улсын Их Хурлын гишүүнээр сонгогдож, улмаар МАХН-МҮАН-ын "Шударга ёс" эвслийн бүлгийн ахлагчаар ажиллаж байна. Орос хэлтэй.

Сангийн сайдад нэр дэвшигч Б.Болор


1997 онд Бельгийн вант улсын Европын Их сургууль, 2012 онд ШУТИСургуулийг төгссөн. Эдийн засагч мэргэжилтэй. Тэрбээр 1997-2000 онд Төрийн өмчит “НИК” компаний гадаад харилцааны мэргэжилтэн, 2001-2006 онд “Гарьд Тур” ХХКомпаний ерөнхий захирал, 2006-2008 онд “Тиара Монголиа” төслийн удирдагч, 2008-2012 онд Монгол Улсын Гадаад харилцааны дэд сайдаар ажилласан. Ардчилсан Залуучуудын холбооны Ерөнхийлөгчийн сонгуульт ажилтай. Б.Болор 2012 оны УИХ-ын зургаа дахь удаагийн сонгуулиар УИХ-ын гишүүнээр сонгогдсон. Улмаар 2014 оны 12 дугаар сараас УИХ-ын Төсвийн байнгын хорооны даргаар сонгогдон ажиллаж байна. 2011 онд Хөдөлмөрийн гавъяаны улаан тугийн одонгоор шагнагдсан. Бизнесийн ухааны магистр цолтой. Англи, орос, франц хэлтэй.

Зам тээврийн сайдад нэр дэвшигч М.Зоригт


1972-1982 онд 10 жилийн 8-р дунд сургууль, 1982-1990 онд Прага хотын Техникийн Их Сургууль, ШУТИС-ийг тус тус төгссөн. Инженер, эдийн засагч мэргэжилтэй. Тэрбээр 1990-1992 онд *Монголын Оюутны Холбоо*-ны ерөнхийлөгч, 1992-2004 онд *Бодь Интернэшнл* ХХК-ий гүйцэтгэх захирал, 2004-2008 онд Монгол Улсын Их Хурлын гишүүн, 2009-2012 онд *Бодь* группын ерөнхийлөгч, 2009 оноос *Зүүн хойд Ази* нийгэмлэгийн тэргүүлэгч гишүүн, 2012 оноос МоАХ-ны дэд тэргүүнээр ажиллаж байсан. 2012 оны Улсын Их Хурлын ээлжит сонгуулиар Монгол Улсын Их Хурлын гишүүнээр дахин сонгогдоод байна. 2010 онд Алтангадас одонгоор, 2012 онд Хөдөлмөрийн гавъяаны улаан тугийн одонгоор шагнагдсан. Англи, орос, чех хэлтэй.

Шадар сайдад нэр дэвшигч Ц.Оюунбаатар


 1977 онд Улаанбаатар хотын Хууль цаазын дунд сургууль, 1984 онд Иванов хотын их сургууль, 1994 онд Москва хотын их сургуулийг хуульч, эдийн засагч мэргэжлээр тус тус төгссөн. Эрх зүйн болон бизнесийн магистр, доктор цолтой. Ц.Оюунбаатар 1977-1979 онд Дорноговь аймагт сум дундын прокурор, 1984-1986 онд Завхан аймгийн прокурорын орлогч, 1986-1990 онд Завхан аймгийн прокурор, 1990-1992 онд Улсын прокурорын ерөнхий хяналтын газрын дарга,1992-2008 онд Удирдлагын академид ахлах багш, дэд профессор, 1999-2000 онд "Талх чихэр" ХК-ийн ерөнхий захирал, 2000-2004 онд Монгол Улсын Их Хурлын гишүүн, 2004-2008 онд Говийг хөгжүүлэх төрийн бус байгууллагуудын дарга, МАХН-ын Удирдах зөвлөлийн гишүүн, 2008-2010 онд Улсын татварын ерөнхий газрын даргаар тус тус ажиллаж байсан. 2012 оноос МАХН-МҮАН-ын “Шударга ёс” эвслээс Монгол Улсын Их Хурлын гишүүнээр сонгогдож, улмаар 2014 оны 12 дугаар сар хүртэл УИХ-ын Аюулгүй байдал, гадаад бодлогын байнгын хорооны даргаар ажиллажээ. Тэрбээр Хөдөлмөрийн гавьяаны улаан тугийн одон, “Алтан гадас” одон, Хууль зүйн албаны тэргүүний ажилтан, Ардын боловсролын тэргүүний ажилтан, Биеийн тамир спортын тэргүүний ажилтан цол, тэмдгээр шагнагдсан. Англи, оросхэлтэй.




Холбоотой мэдээлэл